കോതമംഗലം: കുട്ടമ്പുഴ പഞ്ചായത്തില് രാപകല് വ്യത്യാസമില്ലാതെ കാട്ടാനശല്യം തുടരുന്നു. പൂയംകുട്ടി വനാന്തരത്തില്നിന്നാണ് ജനവാസമേഖലയിലേക്ക് കാട്ടാനക്കൂട്ടം എത്തുന്നത്. പിണവൂര്കുടിയില് കഴിഞ്ഞ ദിവസം നാല് കൊമ്പന്മാരാണ് കൃഷിയും മറ്റു നാശനഷ്ടങ്ങളുമുണ്ടാക്കിയത്.
ചൊവ്വാഴ്ച പുലര്ച്ചെ രണ്ടിന് ആനന്ദന്കുടി കൊച്ചുപറമ്പില് രാധ, ലിസി കുപ്പനാനിക്കല്, അണ്ണാത്തിപാറ രാജേഷ്, ആഞ്ഞിലിമൂട്ടില് സന്തോഷ് എന്നിവരുടെ വീട്ടുമുറ്റത്തും പരിസരത്തും ആനയെത്തി. നിലവില് വീട്ടുകാര്ക്ക് പകലും രാത്രിയും പുറത്തിറങ്ങാന് പറ്റാത്ത അവസ്ഥയാണ്.
കുട്ടികളെ സ്കൂളില് വിടാനാകുന്നില്ല. രാത്രി അനങ്ങാതെ വന്നുനില്ക്കുന്ന ആനക്കൂട്ടം വീടിന്റെ ജനല് പാളികളും ഷെഡ്ഡുകളും നശിപ്പിക്കുന്നത് പതിവായിരിക്കുകയാണെന്നും നാട്ടുകാര് പറഞ്ഞു. കൃഷിനാശം കാരണം കടുത്ത സാമ്പത്തിക പ്രതിസന്ധിയിലാണ് വീട്ടുകാര്.
