കോതമംഗലം: അന്താരാഷ്ട്ര ഉഷ്ണമേഖലാ വനസംരക്ഷണ ദിനത്തോടനുബന്ധിച്ച് മാർ അത്തനേഷ്യസ് കോളേജിലെ ബോട്ടണി വിഭാഗം, ഭൂമിത്രസേന ക്ലബ്, ബയോഡൈവേഴ്സിറ്റി ക്ലബ് എന്നിവയുടെ ആഭിമുഖ്യത്തിൽ ഭൂതത്താൻകെട്ട് വനമേഖലയിൽ പ്രകൃതി പഠനയാത്രയും വനപര്യവേഷണ പരിപാടിയും സംഘടിപ്പിച്ചു.
ബോട്ടണി വിദ്യാർത്ഥികൾക്ക് ഉഷ്ണമേഖലാ വനങ്ങളുടെ ജൈവവൈവിധ്യം നേരിട്ട് പരിചയപ്പെടുത്തുകയും വനസംരക്ഷണത്തിന്റെയും പരാഗണജീവികളുടെ സംരക്ഷണത്തിന്റെയും പ്രാധാന്യത്തെക്കുറിച്ച് അവബോധം സൃഷ്ടിക്കുകയുമായിരുന്നു പരിപാടിയുടെ ലക്ഷ്യം .ഗൈഡ് മാരുടെ നേതൃത്വത്തിൽ വനത്തിലൂടെയുള്ള ട്രെക്കിംഗിൽ വിദ്യാർത്ഥികൾ വിവിധ സസ്യജാലങ്ങളെയും അവയുടെ ആവാസവ്യവസ്ഥകളെയും പരിസ്ഥിതിയുമായുള്ള പരസ്പരബന്ധങ്ങളെയും അടുത്തറിഞ്ഞു.
പരിപാടിയിൽ പങ്കെടുത്ത ഫോറസ്റ്റ് ഓഫീസർ ഗിരീഷ് കുമാർ പി, ബീറ്റ് ഫോറെസ്റ്റ് ഓഫീസർ മനീഷ്മ എന്നിവർ ഉഷ്ണമേഖലാ വനങ്ങളുടെ പാരിസ്ഥിതിക പ്രാധാന്യത്തെക്കുറിച്ചും ജൈവവൈവിധ്യ സംരക്ഷണത്തിൽ യുവജനങ്ങളുടെ പങ്കിനെക്കുറിച്ചും വിശദമായി സംസാരിച്ചു. പരിസ്ഥിതി സംരക്ഷണ പ്രവർത്തനങ്ങളിൽ വിദ്യാർത്ഥികൾ സജീവ പങ്കാളികളാകണമെന്ന് അവർ പറഞ്ഞു .
പരിപാടിക്ക് ബോട്ടണി വിഭാഗം അസിസ്റ്റന്റ് പ്രൊഫസർമാരും, ഭൂമിത്രസേന, ബയോഡൈവേഴ്സിറ്റി ക്ലബ്ബുകളുടെ കോ-ഓർഡിനേറ്റർമാരുമായ ഡോ. ജയലക്ഷ്മി പി.എസ്.,ഡോ. ശരത് ജി. നായർ എന്നിവർ നേതൃത്വം നൽകി.
പ്രകൃതി പഠനയാത്രയിലൂടെ വിദ്യാർത്ഥികൾക്ക് വനസസ്യങ്ങളെ തിരിച്ചറിയുന്നതിനും വനങ്ങൾ നൽകുന്ന പരിസ്ഥിതി സേവനങ്ങളെ മനസ്സിലാക്കുന്നതിനും പ്രകൃതി വിഭവങ്ങളുടെ സംരക്ഷണത്തിന്റെ ആവശ്യകത തിരിച്ചറിയുന്നതിനും അവസരമൊരുങ്ങി.
