കോതമംഗലം: സീനായ് മാർ യൂഹാനോൻ മാംദോന യാക്കോബായ സുറിയാനി പള്ളിയുടെ നേതൃത്വത്തിൽ പുതുതായി തിരഞ്ഞെടുക്കപ്പെട്ട ഷിബു തെക്കുംപുറം എം.എൽ.എയ്ക്ക് സ്വീകരണം നൽകി. പള്ളി വികാരിയും മാനേജിംഗ് കമ്മിറ്റി അംഗങ്ങളും ചേർന്ന് എം.എൽ.എയെ പൊന്നാട അണിയിച്ച് ആദരിച്ചു.
തുടർന്ന് സെന്റ് ജോൺസ് ഹയർ സെക്കൻഡറി സ്കൂളിൽ എസ്.എസ്.എൽ.സി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികൾക്ക് എം.എൽ.എ മൊമെന്റോകൾ നൽകി അനുമോദിച്ചു. സൺഡേ സ്കൂളിൽ പത്താം ക്ലാസ് വിജയിച്ച വിദ്യാർത്ഥികൾക്ക് വികാരി ഫാ. ബേബി മംഗലത്ത് ബൈബിളുകൾ വിതരണം ചെയ്തു.
ഫാ. ബേബി മംഗലത്തിന്റെ അധ്യക്ഷതയിൽ നടന്ന ചടങ്ങിൽ ഷിബു തെക്കുംപുറം എം.എൽ.എ അവാർഡുകൾ വിതരണം ചെയ്തു. ട്രസ്റ്റിമാരായ കൂര്യാക്കോസ് ടി.ഐ., എൽദോസ് എം.സി., ജോർജ് എടപ്പാറ, മാനേജർ ലിബു തോമസ്, പ്രിൻസിപ്പൽ സുമി ജോസഫ്, ഹെഡ്മിസ്ട്രസ് ഷൈനി ഐസക് എന്നിവർ സംസാരിച്ചു.
മാനേജിംഗ് കമ്മിറ്റി, വർക്കിംഗ് കമ്മിറ്റി, സ്കൂൾ ബോർഡ് അംഗങ്ങൾ, സൺഡേ സ്കൂൾ അധ്യാപകർ, വിദ്യാർത്ഥികൾ, രക്ഷിതാക്കൾ തുടങ്ങിയവർ ചടങ്ങിൽ പങ്കെടുത്തു.
