കോതമംഗലം: പിണ്ടിമന പഞ്ചായത്തിലെ ഭൂതത്താൻകെട്ട് ചെങ്കര ഭാഗത്ത് ജനവാസമേഖലയിൽ പാറമടയ്ക്ക് പ്രവര്‍ത്തനാനുമതി നല്‍കിയതിൽ പ്രതിക്ഷേധം. കഴിഞ്ഞദിവസം ചേര്‍ന്ന പഞ്ചായത്ത് ഭരണസമിതി യോഗമാണ് അനുമതി നൽകിയത്. യുഡിഎഫ് ഭരിക്കുന്ന പഞ്ചായത്തില്‍ എല്‍.ഡി.എഫ്.,ബി.ജെ.പി. അംഗങ്ങള്‍ തീരുമാനത്തെ എതിര്‍ത്തിരുന്നു. പാറമട അനുവദിക്കുന്നതിനെതിരെ നാട്ടുകാര്‍ നേരത്തേ പഞ്ചായത്ത് ഭരണസമിതിക്ക് പരാതി നല്‍കിയിരുന്നു. പാറമട ജനജീവിതം ദുസഹമാക്കുമെന്നാണ് ആശങ്ക. സമീപത്ത് ഒട്ടേറെ വീടുകളുണ്ട്. ജലമലിനീകരണത്തിനും അന്തരീഷ മലിനീകരണത്തിനും സാധ്യതയുണ്ടെന്നാണ് നാട്ടുകാര്‍ ചൂണ്ടികാണിക്കുന്നത്. അമിതമായി പാറ പൊട്ടിക്കുന്നതോടെ പ്രദേശത്തെ കുടിവെള്ളസ്രോതസുകള്‍ വറ്റാനുമിടയായേക്കാം.
പാറമടക്ക് അനുമതി നല്‍കിയതിന് പിന്നില്‍ കോഴ ഇടപാട് നടന്നിട്ടുള്ളതായും നാട്ടുകാര്‍ ആരോപിക്കുന്നുണ്ട്. അധികാര കേന്ദ്രങ്ങള്‍ പണം കൈപ്പറ്റിയാണ് തങ്ങളുടെ എതിര്‍പ്പ് അവഗണിക്കുന്നതെന്നും നാട്ടുകാര്‍ പറയുന്നു. പഞ്ചായത്തില്‍ മറ്റ് രണ്ട് പാറമടകള്‍്ക്കുകൂടി പഞ്ചായത്ത് ഭരണസമിതി പ്രവര്‍ത്തനാനുമതി നല്‍കിയിട്ടുണ്ട്. ഭരണസമിതി ഏക കണ്ഠമായാണ് ഇവയുടെ കാര്യത്തില്‍ തീരുമാനമെടുത്തത്. ഇവക്ക് പുറമെ മറ്റ് ഏതാനും പാറമടകള്‍ ആരംഭിക്കുന്നതിനുള്ള നീക്കവും നടക്കുന്നതായി നാട്ടുകാർ പറയുന്നു.വൈകാതെ കൂടുതല്‍ പാറമടകള്‍ പഞ്ചായത്തിന്‍റെ വിവിധ ഭാഗങ്ങളില്‍ പ്രവര്‍ത്തനം തുടങ്ങിയേക്കും. നിലവില്‍ പഞ്ചായത്തില്‍ പാറമടകളൊന്നും പ്രവര്‍ത്തിക്കുന്നുണ്ടായിരുന്നില്ല. വരും ദിവസങ്ങളിൽ പ്രത്യക്ഷ സമര പരിപാടികൾ നടത്തുവാൻ നാട്ടുകാരും വിവിധ സംഘടനകളും ലക്ഷ്യമിടുന്നതായാണ് അറിയുന്നത്.
