മൂവാറ്റുപുഴ: ഓണ്ലൈന് ട്രേഡിംഗ് തട്ടിപ്പ് നടത്തിയ കേസില് പ്രതികളിലൊരാള് അറസ്റ്റില്. മലപ്പുറം വളാഞ്ചേരി സ്വദേശി കുന്നത്ത് മുഹമ്മദ് മുസ്തഫ (24)യെയാണ് മൂവാറ്റുപുഴ പോലീസ് ഇന്സ്പെക്ടര് അനില് ജോര്ജ്ജിന്റെ നേതൃത്വത്തിലുള്ള അന്വേഷണ സംഘം അറസ്റ്റ്ചെയ്തത്. മലപ്പുറം വളാഞ്ചേരിയില് നിന്നാണ് പ്രതി പിടിയിലായത്. വ്യാജ ഓണ്ലൈന് ഷെയര് ട്രേഡിംഗിലൂടെ മൂവാറ്റുപുഴ വാളകം സ്വദേശിയുടെ ഒന്നര കോടിയോളം രൂപാ തട്ടിയെടുത്ത കേസിലെ മൂന്നാം പ്രതിയാണ് പിടിയിലായ മുഹമ്മദ് മുസ്തഫ.
ഓണ്ലൈന് ട്രേഡിംഗില് പണം നിക്ഷേപിച്ചാല് അധിക ലാഭം ലഭിക്കുമെന്ന് പറഞ്ഞ് വിശ്വസിപ്പിച്ച് പ്രതികള്, കാനഡ ആസ്ഥാനമായി പ്രവര്ത്തിക്കുന്ന ഓണ്ലൈന് ട്രേഡിംഗ് കമ്പനിയുടെ വ്യാജ സൈറ്റ് ഉണ്ടാക്കി വിവിധ അക്കൗണ്ടുകള് മുഖേന പരാതിക്കാരനില് നിന്നും പണം വാങ്ങിയ ശേഷം തട്ടിപ്പു നടത്തുകയായിരുന്നു. എന്സിആര്പി പോര്ട്ടലില് രജിസ്റ്റര് ചെയ്ത പരാതിയെ തുടര്ന്നാണ് കേസ് എടുത്തത്. എസ്ഐമാരായ എം.വി ദിലീപ് കുമാര്, എം.എം ഉബൈസ്, എം.കെ ജയചന്ദ്രന്, സീനിയര് സിവില് പോലീസ് ഓഫീസര് എം.പി രതീഷ്, രഞ്ജിത് രാജന് എന്നിവരും സൈബര് സെല്ല് ഉദ്യോഗസ്ഥരുമാണ് അന്വേഷണ സംഘത്തിലുണ്ടായിരുന്നത്.
