കോതമംഗലം: നെല്ലിമറ്റം എംബിറ്റ്സ് എൻജിനിയറിംഗ് കോളേജിലെ ഇലക്ട്രിക്കൽ ആൻഡ് ഇലക്ട്രോണിക്സ് വിഭാഗത്തിലെ അവസാന വർഷ വിദ്യാർത്ഥികൾ വൈ ഫൈ നിയന്ത്രിത ഓട്ടോമേറ്റഡ് ഗൈഡഡ് വെഹിക്കിൾ (എ.വി.ജി) വികസിപ്പിച്ചു. അറുപത് കിലോ ഭാരം വഹിക്കാൻ ശേഷിയുള്ള എ.വി.ജിയാണ് വിദ്യാർത്ഥികൾ രൂപകല്പന ചെയ്തത്. കാമ്പസുകളിൽ ഫയലുകളും ഉത്തരക്കടലാസുകളും കൊണ്ടുപോകുന്നതിനും വ്യവസായ ശാലകളിൽ മെറ്റീരിയലുകളുടെ നീക്കത്തിനും ഉപകരണം പ്രയോജനപ്രദമാകും.
മൊബൈൽ ഫോൺ വഴിയും എ.വി.ജിയെ നിയന്ത്രിക്കാൻ കഴിയും. ഓൺബോർഡ് ക്യാമറയിലൂടെ തത്സമയം നിരീക്ഷിക്കാം. 360 ഡിഗ്രി തിരിയാൻ ശേഷിയുള്ള ഉപകരണം പരിമിതമായ ഇടങ്ങളിലും എളുപ്പത്തിൽ സഞ്ചരിക്കും. പൂർണമായും കോളേജിനകത്ത് വികസിപ്പിച്ചതാണ് ഈ എ.വി.ജി. പ്രൊഫ. മിനു മരിയ ജോയി, പ്രൊഫ. ജിംസൺ വർഗീസ് എന്നിവരുടെ മേൽനോട്ടത്തിൽ ബേസിൽ ബെന്നി, വർഗീസ് പീറ്റർ, പ്രണവ് കെ. പ്രസാദ്, അഭിരാമി രവി, എന്നിവരാണ് എ.വി.ജി വികസിപ്പിച്ചെടുത്തത്.
