കോതമംഗലം :കോതമംഗലം താലൂക്ക് ആശുപത്രിയിലെ സൗകര്യങ്ങൾ സ്വകാര്യമേഖലയോട് കിടപിടിക്കുന്നതാണെന്ന് വ്യവസായ വകുപ്പ് മന്ത്രി പി രാജീവ്. കോതമംഗലം താലൂക്ക് ആശുപത്രിയിൽ എം.എൽ.എ ആസ്തി വികസന ഫണ്ടിൽ നിന്നും 3.49 കോടി രൂപ ചെലവഴിച്ച് നിർമ്മാണം പൂർത്തിയാക്കിയ കാഷ്വാലിറ്റി കം ഡയാലിസിസ് ബ്ലോക്കിന്റെയും കിഫ്ബിയിൽ നിന്നും 11.15 കോടി രൂപ വിനിയോഗിച്ച് നിർമ്മിച്ച ഒഫ്താൽമിക് ഓപ്പറേഷൻ തിയേറ്റർ ആൻഡ് പോസ്റ്റ് നേറ്റൽ വാർഡിന്റെയും ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
സംസ്ഥാനത്തെ എല്ലാ താലൂക്ക് ആശുപത്രികളിലും ഡയാലിസിസ് സംവിധാനം ഒരുക്കി വരികയാണ്. ആരോഗ്യ മേഖലയിൽ അപൂർവമായി സംഭവിക്കുന്ന വീഴ്ചകളെ പർവതീകരിക്കുന്ന പ്രവണതയാണ് ഇപ്പോൾ കണ്ടുവരുന്നത്. അത് ശെരിയല്ല. ഇന്ന് അവയവമാറ്റ ശസ്ത്രക്രിയകൾ ഉൾപ്പെടെ സർക്കാർ ആശുപത്രികളിൽ വളരെ വിജയകരമായി നടന്നുവരുന്നു. സ്വകാര്യമേഖലയിലേതിന് സമാനമായ സൗകര്യങ്ങളാണ് ഇന്ന് സർക്കാർ ആശുപത്രികളിൽ ഉള്ളത് എന്നും മന്ത്രി പറഞ്ഞു.
ആശുപത്രി അങ്കണത്തിൽ സംഘടിപ്പിച്ച ഉദ്ഘാടന ചടങ്ങിൽ ആന്റണി ജോൺ എം.എൽ.എ അധ്യക്ഷനായി. താലൂക്ക് ആശുപത്രി സൂപ്രണ്ട് ഡോ. സാം പോൾ റിപ്പോർട്ട് അവതരിപ്പിച്ചു.
കോതമംഗലം നഗരസഭാ ചെയർപേഴ്സൺ ഭാനുമതി രാജു, വൈസ് ചെയർമാൻ പ്രിൻസ് വർക്കി, നഗരസഭാ സ്ഥിരം സമിതി അധ്യക്ഷരായ സിന്ധു ജിജോ, അനൂപ് ജോർജ്, ജോർജ് അമ്പാട്ട്, വാർഡ് കൗൺസിലർ മിനി മാത്യു, നഗരസഭാ പ്രതിപക്ഷ നേതാവ് സി.പി.എസ് ബാലൻ, മുൻ നഗരസഭാ ചെയർമാൻ കെ.കെ ടോമി, എൻ.എച്ച്.എം ജില്ലാ പ്രോഗ്രാം മാനേജർ ഡോ. പ്രിസ്ലിൻ ജോർജ്ജ്, യുവജന ക്ഷേമ ബോർഡ് മുൻ വൈസ് ചെയർമാൻ എസ്. സതീഷ്, എം.പി.ഐ ചെയർമാൻ ഇ.കെ ശിവൻ, കൗൺസിലർമാരായ പി. എം നവാസ് , എൽദോസ് കേച്ചേരി, എച്ച്.എം.സി അംഗങ്ങളായ പി.പി മൈതീൻ ഷാ, അഡ്വ. മാർട്ടിൻ സണ്ണി, ടീന മാത്യു, മാത്യു മുക്കത്ത്, ഇന്ദിര ചന്ദ്രൻ, വിവിധ രാഷ്ട്രീയകക്ഷി പ്രതിനിധികളായ തോമസ് തോമ്പ്രയിൽ, മനോജ് ഗോപി, ഷാജി പീച്ചക്കര, സാജൻ അമ്പാട്ട്, ബേബി പൗലോസ്, ആന്റണി പുല്ലൻ തുടങ്ങിയവർ ചടങ്ങിൽ പങ്കെടുത്തു.
