കോതമംഗലം: പത്തുവര്ഷം മുമ്പ് കിടപ്പുരോഗി പരിചരണം, സ്ത്രീശാക്തീകരണം, വിദ്യാഭ്യാസം, തൊഴില് പരിശീലനം, കൃഷി- മൃഗസംരക്ഷണം, ഭക്ഷ്യസുരക്ഷ എന്നീ പ്രവര്ത്തനങ്ങള്ക്കായി രൂപീകരിച്ച കോതമംഗലം എന്റെ നാട് കൂട്ടായ്മയുടെ പുതിയ ഓഫീസ് മന്ദിരം എന്റെ നാട് എന്ക്ലേവിന്റെ ഉദ്ഘാടനം നടത്തി. മുന് മന്ത്രി പി.ജെ.ജോസഫ് എംഎല്എ ഉദ്ഘാടനം ചെയ്തു.
എന്റെ നാട് ജനകീയ കൂട്ടായ്മ സാമൂഹ്യപ്രവര്ത്തനത്തിന്റെ ഉദാത്തമായ മാതൃകയാണെന്നും പൊതുപ്രവര്ത്തകര് സമൂഹത്തില് പാര്ശ്വവല്ക്കരിക്കപ്പെട്ടവരെ ചേര്ത്തുപിടിക്കാനുള്ള നല്ല മനസ് കാണിക്കണമെന്നും പി.ജെ.ജോസഫ് പറഞ്ഞു.
എന്റെ നാട് ചെയര്മാന് ഷിബു തെക്കുംപുറം അധ്യക്ഷത വഹിച്ചു. നാമമാത്രമായ കിടപ്പുരോഗികളെ പരിചരിച്ചും വാര്ധക്യവും വൈധവ്യവും മൂലം ക്ലേശം അനുഭവിക്കുന്ന അമ്മമാര്ക്ക് ധനസഹായം നല്കിയും ആരംഭിച്ച എന്റെ നാട് ജനകീയ കൂട്ടായ്മ അയ്യായിരത്തോളം കിടപ്പുരോഗികളെ പരിചരിക്കുന്ന, 250-ല് പരം അമ്മമാര്ക്ക് പ്രതിമാസം ആയിരം രൂപ വീതം പെന്ഷന് നല്കുന്നതുള്പ്പെടെ നൂറോളം പദ്ധതികള് നടപ്പാക്കുന്ന പ്രസ്ഥാനമായി വളര്ന്നിട്ടുണ്ടെങ്കില് ജനങ്ങള് നല്കിയ പിന്തുണ ഒന്നുകൊണ്ടു മാത്രമാണ് ഇതു സാധ്യമായതെന്ന് ഷിബു പറഞ്ഞു.
എല്ദോസ് കുന്നപ്പിള്ളി എംഎല്എ, പി.കെ. മൊയ്തു, ജോര്ജ് അമ്പാട്ട്, സൗമ്യ ശശി, പി.എം.സിദ്ദിഖ്, ഷിബു കുര്യാക്കോസ്, സി.കെ.സത്യന്, നിസാമോള് ഇസ്മായില്, പ്രഫ.കെ.എം.കുര്യാക്കോസ്, ബിജി ഷിബു, ഡാമി പോള്, ബാബു പോള്, ഇ.എം.മൈക്കിള്, കെ.പി. കുര്യാക്കോസ്,ജോഷി പൊട്ടക്കല്, എം.യു.ബേബി, പി.എ. പാദുഷ, ജോഷി കുര്യാക്കോസ്, പി.സി. ജോര്ജ് എന്നിവ പങ്കെടുത്തു.
