കോതമംഗലം: കുട്ടമ്പുഴ പൂയംകുട്ടിപുഴയില് ഒഴുക്കിലടിഞ്ഞ കാട്ടാനയുടെ ജഡം മൂന്നാം ദിവസവും കരയ്ക്കെത്തിക്കാനായില്ല. ഒരാഴ്ചയിലേറെ പഴക്കമുള്ള ജഡം അഴുകിയവസ്ഥയിലാണ്. കണ്ടംപാറ ഭാഗത്ത് പുഴക്ക് നടുവിലെ പാറക്കെട്ടില് തങ്ങിനില്ക്കുന്ന നിലയില് ശനിയാഴ്ച രാവിലെയാണ് ജഡം കണ്ടെത്തിയത്.
കഴിഞ്ഞ രണ്ട് ദിവസം അഗ്നി രക്ഷാസേനാംഗങ്ങളുടെ നേതൃത്വത്തില് ജഡം കരയ്ക്കടുപ്പിക്കാന് നടത്തിയ ശ്രമം വിഫലമായി. ജലനിരപ്പ് ഉയര്ന്നിരിക്കുന്നതും ശക്തമായ ഒഴുക്കുമായിരുന്നു കാരണം. അഗ്നി രക്ഷാ സേനാംഗങ്ങള് ജഡത്തില് കയറുകൊണ്ട് ബന്ധിച്ച് മരത്തില്കെട്ടി നിര്ത്തിയിരിക്കുകയാണ്.
തിങ്കളാഴ്ച രാവിലെ മുതല് വനപാലകര് എത്തി ജഡം വലിച്ചു കയറ്റാന് നോക്കിയെങ്കിലും പുഴയിലെ ഒഴുക്ക് പ്രതിസന്ധിയിലാക്കി. ഞായറാഴ്ച രാത്രിയും തിങ്കളാഴ്ച പകലും മഴ അല്പ്പം ശമിച്ചെങ്കിലും പുഴയിലെ ജലനിരപ്പില് കാര്യമായ വ്യത്യാസം ഉണ്ടായിട്ടില്ല. പുഴയിലെ ജലനിരപ്പ് കുറഞ്ഞ ശേഷമേ ആനയെ കരക്കെത്തിക്കാന് സാധിക്കു. മറ്റ് മാര്ഗവും തേടുന്നുണ്ടെന്ന് അധികൃതര് പറഞ്ഞു.
