കോതമംഗലം: പ്രവര്ത്തന സമയം പാലിക്കുന്നില്ലെന്ന് കുറ്റംചുമത്തി റേഷന് കട അടപ്പിക്കാനെത്തിയ താലൂക്ക് സപ്ലൈ ഓഫീസറെ കുടുക്കി നാട്ടുകാര്. മദ്യപിച്ചെത്തിയ കോതമംഗലത്തെ സപ്ലൈ ഓഫീസര് ഷിജു പി.തങ്കച്ചനാണ് വെട്ടിലായത്. ചെറുവട്ടൂരില് 41-ാംനമ്പര് റേഷന്കടക്കെതിരെ നടപടിയെടുക്കാനാണ് ഇന്നലെ രാവിലെ സപ്ലൈ ഓഫീസര് എത്തിയത്.
കടയ്ക്കെതിരെയുള്ള നടപടി പ്രതിരോധിക്കാന് പ്രദേശവാസികളെത്തിയിരുന്നു. സപ്ലൈ ഓഫീസറുടെ സംസാരത്തിലും പെരുമാറ്റത്തിലും സംശയം തോന്നിയ നാട്ടുകാര് പോലീസിനെ വിവരം അറിയിച്ചു. താലൂക്ക് ആശുപത്രിയില് എത്തിച്ച് നടത്തിയ വൈദ്യപരിശോധനയില് മദ്യപിച്ചതായി തെളിഞ്ഞു. ആദ്യം ദേഹാസ്വാസ്ഥ്യം പ്രകടിപ്പിച്ച ഷിജു പി.തങ്കച്ചനെ സ്വകാര്യആശുപത്രിയില് പരിശോധന നടത്താന് ശ്രമിച്ചിരുന്നു. ഇവിടെ വച്ച് മുങ്ങാനുള്ള ശ്രമവും നാട്ടുകാര് പരാജയപ്പെടുത്തി.ഷിജു പി.തങ്കച്ചനെതിരെ വകുപ്പ് തല അന്വേക്ഷണം ആരംഭിച്ചിട്ടുണ്ട്. സസ്പെന്ഡ് ചെയ്യുമെന്നാണ് സൂചന. റേഷന്കടയുടെ ലൈസന്സ് സസ്പെന്ഡ് ചെയ്ത നടപടിയും പിന്വലിച്ചേക്കും. സപ്ലൈ ഓഫീസറുടെ നടപടികളില് പ്രതിഷേധിച്ച് താലൂക്കിലെ റേഷന് വ്യാപാരികള് ഇന്ന് സപ്ലൈ ഓഫീസിന് മുമ്പില് ധര്ണ നടത്തും.
