കോതമംഗലം :- തങ്കളത്ത് വീടിനോട് ചേർന്ന് സംരക്ഷണ മതിലിലൊളിച്ച കൂറ്റൻ മൂർഖൻ പാമ്പിനെ അതിസാഹസികമായി പിടികൂടി. തങ്കളത്തിന് സമീപം എച്ചിത്തൊണ്ട് റോഡിലുള്ള മോണിയുടെ വീടിനോട് ചേർന്നാണ് കൂറ്റൻ മൂർഖൻ പാമ്പിനെ കണ്ടത്. വീടിൻ്റെ പിറകിൽ അടുക്കളയോട് ചേർന്ന് സംരക്ഷണമതിലിനു മുകളിൽ പാമ്പിനെ കണ്ടെങ്കിലും പിന്നീടത് പൊത്തിലൊളിക്കുകയായിരുന്നു.

വീട്ടുകാർ ഉടനെ വനംവകുപ്പിൽ വിവരം അറിയിച്ചു. തുടർന്ന് പാമ്പുപിടുത്ത വിദഗ്ദ്ധൻ മാർട്ടിൻ മേക്കമാലി സ്ഥലത്തെത്തി മതിലിന് പിന്നിലെ പൊത്തിലൊളിച്ച മൂർഖനെ കണ്ടെത്തുകയായിരുന്നു. തുടർന്ന് മതിൽ പൊളിച്ചു നീക്കിയാണ് കൂറ്റൻ പാമ്പിനെ ശാസ്ത്രീയ രീതിയിൽ മാർട്ടിൻ ചാക്കിലാക്കിയത്. ഏറെ നേരത്തെ പരിശ്രമത്തിന് ശേഷമാണ് പാമ്പിനെ പിടികൂടാൻ കഴിഞ്ഞ തെന്ന് മാർട്ടിൻ മേക്കമാലി പറഞ്ഞു.

പല്ലാരിമംഗലം : കഴിഞ്ഞ ദിവസങ്ങളിലുണ്ടായ തുടർച്ചയായ മഴയെത്തുടർന്ന് വീടിന്റെ സംരക്ഷണഭിത്തി . ഇടിഞ്ഞ് വീണു. പല്ലാരിമംഗലം രണ്ടാം വാർഡ് ഏണിയാലിൽ ലൈലയുടെ വീട്ടിന്റെ പിൻഭാഗത്തെ സംരക്ഷണഭിത്തിയാണ് പതിനഞ്ചടി താഴ്ചയിലേക്ക് ഇടിഞ്ഞ് വീണത്. വീടിന്റെ നിലനില്‌പിന് ഭീക്ഷണിയാകുന്ന തരത്തിൽ പിൻ ഭാഗത്തെ മുറ്റംമുഴുവനായി ഇടിഞ്ഞുതാഴ്ന്നു. പഞ്ചായത്ത് വൈസ് പ്രസിഡന്റ് ഒ ഇ അബ്ബാസ്, വാർഡ് മെമ്പർ കെ എം മൈതീൻ, എന്നിവർ സ്ഥലം സന്ദർശിച്ചു. വില്ലേജ് ഓഫീസർ സ്ഥലം സന്ദർശിച്ച് നഷ്ടം തിട്ടപ്പെടുത്തി നിർധന കുടുംബത്തിന് അടിയന്തിര നഷ്ടപരിഹാരം നൽകണമെന്ന് ജനപ്രതിനിധികൾ ആവശ്യപ്പെട്ടു.

കോതമംഗലം : വർദ്ധിച്ചുവരുന്ന മദ്യം മയക്കുമരുന്ന് ലഹരി വ്യാപനം, തൊഴിലില്ലായ്മ, കൃഷി ബഫർ സോൺ പ്രശ്നങ്ങൾ, ദളിത് ക്രൈസ്തവ പ്രശ്നങ്ങൾ, തീരദേശ മത്സ്യത്തൊഴിലാളി പ്രശ്നങ്ങൾ എന്നിവയ്ക്ക് ശാശ്വത പരിഹാരം ആവശ്യപ്പെട്ടുകൊണ്ട് ഇരുപതോളം ക്രൈസ്തവ സംഘടനകളുടെ കൂട്ടായ്മയായ UCF (യുണൈറ്റഡ് ക്രിസ്ത്യൻ ഫോറം) കാസർഗോഡ് മുതൽ തിരുവനന്തപുരം വരെ നടത്തുന്ന ലോങ്ങ് മാർച്ചിന് കോതമംഗലത്ത് സ്വീകരണം നൽകി. കോതമംഗലം രൂപത വികാരി ജനറൽ പെരിയ ബഹു. ഫാ. ഫ്രാൻസിസ് കീരംപാറ സ്വീകരണ സമ്മേളനം ഉദ്ഘാടനം ചെയ്തു. കത്തീഡ്രൽ വികാരി ബഹു ഫാ തോമസ് ചെറുപറമ്പിൽ ലോങ്ങ് മാർച്ച് ക്യാപ്റ്റൻ അഡ്വക്കേറ്റ് ജസ്റ്റിൻ പള്ളിവാതുക്കലിനെ പൊന്നാടയണിച്ച് സ്വീകരിക്കുകയും ആശംസകൾ അർപ്പിക്കുകയും ചെയ്തു.

കോതമംഗലം രൂപത ഡിഎഫ്സി പ്രസിഡന്റ് ഡിഗോൾഡ്, എ കെ സി സി പ്രതിനിധി പ്രൊഫസർ ജോർജ് കുര്യാക്കോസ്, പിതൃവേദി പ്രസിഡന്റ് സോണി പമ്പയ്ക്കൽ, ജിജോ അറയ്ക്കൽ എന്നിവർ ആശംസകൾ നേർന്നു സംസാരിച്ചു. കേരളം ഇന്ന് അഭിമുഖീകരിച്ചു കൊണ്ടിരിക്കുന്ന ഈ പൊതു വിഷയങ്ങൾ ഉയർത്തിക്കൊണ്ടുള്ള ഈ ലോങ്ങ് മാർച്ചിന് ആവേശജനകമായ സ്വീകരണമാണ് കേരളീയ പൊതുസമൂഹത്തിൽ നിന്ന് ലഭിക്കുന്നത്. നവംബർ 23 ആം തീയതി കാസർഗോഡ് നിന്ന് ആരംഭിച്ച മാർച്ച് ഡിസംബർ പത്താം തീയതി തിരുവനന്തപുരത്ത് സമാപിക്കുന്നതാണ്. രാഷ്ട്രീയ നേതൃത്വംവും ഭരണകർത്താക്കളും ഈ വിഷയങ്ങൾ കണക്കിലെടുക്കണമെന്നും ശാശ്വതമായ പരിഹാര മാർഗ്ഗങ്ങൾ രൂപപ്പെടുത്തണമെന്നും ക്യാപ്റ്റൻ അഡ്വക്കേറ്റ് ജസ്റ്റിൻ പള്ളിവാതുക്കൽ ആവശ്യപ്പെട്ടു.

കത്തീഡ്രൽ പള്ളി അസിസ്റ്റന്റ് വികാരി ഫാദർ സിറിൽ വള്ളോംകുന്നേൽ സ്വീകരണ സമ്മേളനത്തിന് നന്ദി അർപ്പിച്ചു.കോതമംഗലം ഇടവകയിലെ കൈക്കാരന്മാർ, പാരിഷ് കൗൺസിൽ അംഗങ്ങൾ, പിതൃവേദി, എ കെ സി സി, ഡി എഫ് സി, മാതൃവേദി, ഭാരവാഹികളും പ്രതിനിധികളും സ്വീകരണ യോഗത്തിൽ പങ്കുചേർന്നു.