നെല്ലിമറ്റം: ടൗണിലെ ഹൃദയഭാഗമായ ബസ് സ്റ്റോപിന് സമീപത്തെ പീച്ചാട്ട് കുടുംബവകയായ ഏഴര സെന്റ് സ്ഥലത്തിന്റെ ഉടമസ്ഥാവകാശം സംബന്ധിച്ച് വളരെ വർഷങ്ങളായി നിലനിന്നിരുന്ന സഹോദരങ്ങൾ തമ്മിലുള്ള അവകാശ തർക്കം നെല്ലിമറ്റം ടൗണിൽ അക്രമത്തിൽ കലാശിച്ചു. മാസങ്ങൾക്ക് മുൻപ് അന്തരിച്ച നെല്ലിമറ്റം മില്ലുംപടി സ്വദേശി ജോർജ്ജിന്റെ (പീച്ചാട്ട് സോമിൽ) മക്കളായ അഡ്വ.പോൾ ജോർജ്ജ്, റിയ ജോർജ്ജ് എന്നിവർ തമ്മിൽ വർഷങ്ങളായി നിലനിന്നിരുന്ന സ്വത്ത് തർക്കവും കുടുംബവഴക്കുമാണ് ഏറ്റവും അവസാനം ടൗണിൽ പട്ടാപ്പകൽ സംഘർഷത്തിൽ കലാശിച്ചത്.അന്തരിച്ച ജോർജ്ജ് സഹോദരങ്ങളായ കുര്യാക്കോസ്(അടിമാലി), സഹോദരിമാരായ ഡെയ്സി, വിക്ടോറിയ, റോസിലി (ബോംബെ ) എന്നിവരുടെ പേരിലാണ് സ്ഥലം.
എന്നാൽ ഈ സ്ഥലം റിയ ഏകപക്ഷീയമായി കൈവശം വയ്ക്കുകയായിരുന്നെന്ന് പോൾ ആരോപിക്കുന്നു. ഇക്കഴിഞ്ഞ ദിവസം റിയയുടെ നേതൃത്വത്തിൽ നിർമ്മാണ പ്രവർത്തനത്തിനായി സാധനങ്ങൾ ഇറക്കുകയും ചെയ്തു.ഇത്തരം നിർമ്മാണ പ്രവർത്തനങ്ങൾ നടത്താൻ പറ്റില്ലയെന്ന് പറഞ്ഞ് പോളും വിക്ടോറിയയുടെ മകൻ പോൾസണും ചേർന്ന് തടയാൻ ശ്രമിക്കുകയും ചെയ്തു. ഇതിനിടയിൽ റിയയുടെ നേതൃത്വത്തിൽ കണ്ടാലറിയാവുന്ന നാലോളം പേർ ചേർന്ന് പോളിനെ അതിക്രൂരമായി മർദ്ദിക്കുകയും ചെയ്തതായി ദൃക്സാക്ഷികൾ പറയുന്നു.മുൻ കാലങ്ങളിൽ പല പ്രാവശ്യം പോൾ അനാവശ്യമായി തനിക്കവകാശപ്പെട്ടതും ഞാൻ നടത്തിവന്ന സ്ഥപനങ്ങളേയും നിരന്തരം ഉപദ്രവിച്ചിരുന്നതായി റിയ പോലീസിനോട് പറഞ്ഞു.
ഇവർ തമ്മിലുള്ള സ്വത്ത് തർക്കമുൾപ്പെടെയുള്ള നിരവധി കേസുകൾ ഊന്നുകൽ സ്റ്റേഷനിലും വിവിധ കോടതികളിലും നിലനിൽക്കുന്നുണ്ട്. മാതാവ് റിയയുടെ സംരക്ഷണയിലാണ് കഴിഞ്ഞ് വരുന്നത്.റിയയുടെ സംരക്ഷണത്തിലിരിക്കെയാണ് പിതാവ് മരിച്ചത്.നെല്ലിമറ്റം ടൗണിനെ വിറപ്പിച്ച സംഭവത്തിൽ നാട്ടുകാർ ആശങ്കയിലാണ്. ഊന്നുകൽ സർക്കിൾ ഇസ്പെക്ടർ ഋഷികേശിന്റെ നേതൃത്വത്തിൽ സംഭവസ്ഥലം സന്ദർശിച്ച് തെളിവെടുപ്പ് നടത്തി.ഗുരുതര വകുപ്പുകൾ പ്രകാരം കേസെടുത്തിട്ടുള്ളതായി പോലീസ് പറഞ്ഞു.
