മുവാറ്റുപുഴ: ബസ് യാത്രക്കാരിയുടെ പേഴ്‌സ് മോഷ്ടിക്കാന്‍ ശ്രമിച്ച സ്ത്രീയെ മുവാറ്റുപുഴ പോലീസ് അറസ്റ്റ് ചെയ്തു. തമിഴ്നാട് തെങ്കാശി പൂക്കട തെരുവിൽ മഞ്ജു (40) വിനെയാണ് മുവാറ്റുപുഴ പോലീസ് അറസ്റ്റ് ചെയ്തത്. മുവാറ്റുപുഴ പെരുമ്പാവൂർ റോഡിൽ സർവീസ് നടത്തുന്ന കെ.എസ്.ആര്‍.റ്റി.സി ബസിൽ ആണ് കേസിനാസ്പദമായ സംഭവം. തൃക്കളത്തൂർ കാവുംപടി ഭാഗത്തു നിന്നും പായിപ്ര ഭാഗത്തെക്ക് സഞ്ചരിച്ച യാത്രക്കാരി ഇറങ്ങാൻ തുടങ്ങുന്ന സമയം, തിരക്ക് ഉണ്ടാക്കി സിബ്ബ് തുറന്ന് ബാഗില്‍ നിന്നും പേഴ്‌സ് കൈക്കലാക്കാൻ ശ്രമിക്കുകയായിരുന്നു. അന്വേഷണസംഘത്തിൽ മുവാറ്റുപുഴ പോലീസ് ഇൻസ്‌പെക്ടർ എം.കെ.സജീവ്, എസ്ഐ സയിദ്, എഎസ്ഐ ബിനോജ് ഗോപാലകൃഷ്ണൻ, സിപിഒമാരായ മിഥു മോഹൻ, സന്ധ്യ ടി.കെ എന്നിവരാണ് ഉണ്ടായിരുന്നത്.
