മദ്രസ അധ്യാപകർക്ക് അടിയന്തിര ധനസഹായം അനുവദിക്കണമെന്നാവശ്യപ്പെട്ടു മുഖ്യമന്ത്രിക്ക് എം.എൽ.എയുടെ കത്ത്.

പെരുമ്പാവൂർ : മദ്രസ അധ്യാപകർക്ക് മദ്രസ അധ്യാപക ക്ഷേമനിധി ബോർഡിൽ നിന്നും അടിയന്തിര ധനസഹായമായി 2000 രൂപ അനുവദിക്കണമെന്ന് എൽദോസ് കുന്നപ്പിള്ളി എം.എൽ.എ മുഖ്യമന്ത്രി പിണറായി വിജയന് നൽകിയ കത്തിൽ ആവശ്യപ്പെട്ടു. അപേക്ഷിച്ചിട്ടു ഒരു മാസം കഴിഞ്ഞിട്ടും തുക അനുവദിക്കുവാൻ ബോർഡ് തയ്യാറാകാത്തത് കുറ്റകരമായ അനാസ്ഥയാണെന്ന് എം.എൽ.എ കുറ്റപ്പെടുത്തി.

ഓരോ വർഷവും അധ്യാപകർ അടയ്ക്കുന്ന വിഹിതത്തിൽ നിന്നും ചെറിയൊരു തുക ഈ ലോക്ക്ഡൗൺ കാലത്ത് നൽകുന്നതിന് കാലതാമസം വരുത്തരുത്. ആത്മീയ അറിവുകൾ നൽകി പുതു തലമുറയെ രൂപപ്പെടുത്തുന്നതിൽ നിർണ്ണായക പങ്ക് വഹിക്കുന്നവരാണ് മത അധ്യാപകർ. ഈ ലോക്ക് ഡൗൺ കാലത്ത് ദുരിതം അനുഭവിക്കുന്ന മദ്രസ അധ്യാപകർക്ക്  എത്രയും വേഗത്തിൽ ധനസഹായം ലഭ്യമാക്കുവാനുള്ള നടപടികൾ പൂർത്തികരിക്കുവാൻ മുഖ്യമന്ത്രി ഇടപെടണമെന്ന് എം.എൽ.എ കത്തിൽ അഭ്യർത്ഥിച്ചിട്ടുണ്ട്