കുട്ടമ്പുഴ: കേരളത്തിലെ ഏക ഗോത്രവര്‍ഗ്ഗ പഞ്ചായത്തായ ഇടമലക്കുടി രൂക്ഷമായ ധനക്കമ്മി മൂലം പ്രതിസന്ധിയില്‍. പഞ്ചായത്തിലെ സാമ്പത്തിക പ്രശ്നങ്ങള്‍ ഇതര പഞ്ചായത്തുകളിലെ സാഹചര്യങ്ങളോട് താരതമ്യം ചെയ്യാവുന്നതല്ലെന്നും, അധികൃതര്‍ അടിയന്തരമായി ഇടപെട്ട് പ്രശ്നം പരിഹരിക്കണമെന്നും കുട്ടമ്പുഴ പഞ്ചായത്ത് ഗ്രാമവികസന സമിതി പ്രസിഡന്റ് ഷാജി പയ്യാനിക്കല്‍ ആവശ്യപ്പെട്ടു.
ഇടമലക്കുടിയിലെ ജീവനക്കാര്‍ മാസങ്ങളായി ശമ്പളമില്ലാതെയാണ് ജോലി ചെയ്യുന്നത്. ജീവനക്കാരുടെ പി.എഫ് ഉള്‍പ്പെടെയുള്ള സാലറി റിക്കവറികള്‍ പോലും കഴിഞ്ഞ ജനുവരി മുതല്‍ അടയ്ക്കാന്‍ സാധിച്ചിട്ടില്ല. വന്യമൃഗങ്ങളുടെ മുന്നിലൂടെ, ഘോരവനത്തിലൂടെ കിലോമീറ്ററുകളോളം കാല്‍നടയായി ജീവന്‍ പണയംവെച്ചാണ് ജീവനക്കാര്‍ ഇവിടെ ഓഫീസിലെത്തുന്നത്. എന്നാല്‍ ശമ്പളമോ ദൈനംദിന ചെലവുകള്‍ നടത്താനുള്ള ഫണ്ടോ ഇല്ലാത്തതിനാല്‍ ജീവനക്കാരും ജനപ്രതിനിധികളും കടുത്ത ദുരിതത്തിലാണ്.
വനമേഖലയായതിനാല്‍ മറ്റ് പഞ്ചായത്തുകളെപ്പോലെ കെട്ടിട നികുതിയോ ലൈസന്‍സ് ഫീസോ വാടകയോ ഈടാക്കാന്‍ ഇടമലക്കുടിക്ക് കഴിയില്ല. തുച്ഛമായ ഏതാനും ആയിരം രൂപകള്‍ മാത്രമാണ് ഇവിടുത്തെ ആകെയുള്ള വാര്‍ഷിക തനത് വരുത്തമാനം. വാര്‍ഷിക ഭരണച്ചെലവിനായി ചുരുങ്ങിയത് 1.5 കോടി രൂപയെങ്കിലും ലഭ്യമാകേണ്ടതുണ്ട്. പഞ്ചായത്തിന്റെ പ്രത്യേക സാഹചര്യം കണക്കിലെടുത്ത് പ്രതിവര്‍ഷം രണ്ട് കോടി രൂപയെങ്കിലും ലഭ്യമാക്കാനുള്ള സംവിധാനം ഒരുക്കണമെന്നും, അടിയന്തരമായി പ്രത്യേക ഗ്രാന്റ് അനുവദിച്ച് പരിഹാരമുണ്ടാക്കണമെന്നും ആവശ്യപ്പെട്ട് ഷാജി പയ്യാനിക്കല്‍ മുഖ്യമന്ത്രിക്ക് നിവേദനം നല്‍കി.
