കോതമംഗലം : കൊച്ചി ധനുഷ്കോടി ദേശീയപാതയിൽ നേര്യമംഗലം വനത്തിൽ കെഎസ്ആർടിസി ബസ് അപകടത്തിൽപ്പെട്ടു. മൂന്നാറിൽ നിന്നും എറണാകുളത്തേക്ക് സർവീസ് നടത്തുന്ന ബസ്സാണ് അപകടത്തിൽപ്പെട്ടത്. ഇന്ന് രാവിലെ 10 മണിയോടെയായിരുന്നു സംഭവം. നേര്യമംഗലം വനത്തിൽ അഞ്ചാംമൈലിന് സമീപത്തെത്തിയപ്പോൾ വാഹനത്തിന്റെ ബ്രേക്ക് തകരാറിലാവുകയായിരുന്നു. ഇത് മനസ്സിലാക്കിയ ഡ്രൈവർ ഉടൻതന്നെ വാഹനം റോഡിന്റെ സൈഡിലേക്ക് ഇടിപ്പിച്ച് നിർത്തുകയായിരുന്നു.
വാഹനത്തിന് വേഗത കുറവായിരുന്നതിനാലും ഡ്രൈവറുടെ സമയോചിതമായ ഇടപെടൽ മൂലവും വൻ ദുരന്തമാണ് ഒഴിവായത്. നിരവധി യാത്രക്കാർ വാഹനത്തിൽ ഉണ്ടായിരുന്നെങ്കിലുംആർക്കും പരിക്കേറ്റിട്ടില്ലെന്ന് സ്ഥലത്തെത്തിയ ഹൈവേ പോലീസ് അധികൃതർ വ്യക്തമാക്കി. വാഹനത്തിൻറെ മുൻഭാഗം ഭാഗികമായി തകർന്നിട്ടുണ്ട്.
