കോതമംഗലം: കോതമംഗലത്ത് കടുത്ത കുടിവെള്ളക്ഷാമം അനുഭവപ്പെടുമ്പോഴും പരിഹാരം കാണേണ്ട വാട്ടര് അതോറിറ്റി സബ് ഡിവിഷണല് ഓഫീസ് പ്രവര്ത്തനം ഉദ്യോഗസ്ഥരില്ലാതെ പ്രതിസന്ധിയില്. അസിസ്റ്റന്റ് എക്സിക്യൂട്ടീവ് എന്ജിനീയര്, അസിസ്റ്റന്റ് എന്ജിനീയര് എന്നീ പ്രധാന തസ്തികകളില് ഉദ്യോഗസ്ഥരില്ലാത്തതാണ് നിലവിലെ പ്രതിസന്ധിക്ക് കാരണം. ഈ തസ്തികകളിലുണ്ടായിരുന്നവര് സ്ഥലം മാറിപ്പോയെങ്കിലും പകരം നിയമനം നടന്നിട്ടില്ല.
നിലവില് അസിസ്റ്റന്റ് എക്സിക്യുട്ടീവ് എന്ജിനീയറുടെ ചുമതല മൂവാറ്റുപുഴയിലെയും അസിസ്റ്റന്റ് എന്ജിനിയറുടെ ചുമതല കൂത്താട്ടുകുളത്തെയും ഉദ്യോഗസ്ഥര്ക്കാണ് നല്കിയിരിക്കുന്നത്. എ.എക്സ്.ഇ ഇല്ലാതായിട്ട് നാളുകളേറെയായി. വെള്ളിയാഴ്ചയാണ് എ.ഇ. ചുമതലയൊഴിഞ്ഞത്. ഇതോടെ പരാതിയുമായി എത്തുന്ന ജനപ്രതിനിധികള്ക്കും പൊതുജനങ്ങള്ക്കും കൃത്യമായ മറുപടി നല്കാന് പോലും ഓഫീസില് ആരുമില്ലാത്ത അവസ്ഥയാണ്.
മുനിസിപ്പാലിറ്റിയില് മുന്പുണ്ടായിരുന്ന രണ്ട് കരാറുകാര് ഇപ്പോള് ഒന്നായി ചുരുങ്ങി. കീരമ്പാറയിലൊഴികെ മറ്റിടങ്ങളില് അറ്റകുറ്റപ്പണി നടക്കുന്നില്ല. ഇതുമൂലം വന്തോതില് വെള്ളം ചോര്ന്നുപോകുന്നു. ബില്ലുകള് മാറിക്കിട്ടാന് വര്ഷങ്ങള് കാത്തിരിക്കേണ്ടി വരുന്നതിനാലാണ് കരാറുകാര് പിന്മാറുന്നത്. നിലവിലുള്ള കരാറുകാര്ക്കും ലക്ഷങ്ങള് കുടിശിക ലഭിക്കാനുണ്ട്.
