കോതമംഗലം: തങ്കളം-കോഴിപ്പിള്ളി ന്യൂ ബൈപ്പാസിന്റെ കൊള്ളിക്കാട് ഭാഗത്ത് മാസങ്ങള്ക്കു മുമ്പ് നിലച്ച നിര്മാണം ഇനിയും പുനരാരംഭിക്കാനാകാതെ നീളുന്നു. ഏകദേശം ഒരു കിലോമീറ്ററോളം ഭാഗത്താണ് നിര്മാണ സ്തംഭനം. സ്ഥലം ഏറ്റെടുത്തതുമായി ബന്ധപ്പെട്ടുള്ള കോടതി ഇടപെടല് ഉള്പ്പടെയുള്ള കാര്യങ്ങളാണ് അന്ന് തടസമായത്. മഴക്കാലം ആരംഭിക്കുന്നതിന് മുമ്പ് ഈ ഭാഗത്ത് നിര്മാണജോലികള് പൂര്ത്തിയാക്കി ടാറിംഗ് സാധ്യമാക്കിയില്ലെങ്കില് ദുരിതത്തിലാകും.
മഴക്കാലത്ത് ഇവിടം ചെളിക്കുളമായി മാറാനും സാധ്യതയുണ്ട്. കലാ ജംഗ്ഷന് മുതല് കൊള്ളിക്കാട് വരെയും കോഴിപ്പിള്ളിയിലെ അവസാനഭാഗത്ത് ഏതാനും മീറ്ററിലും ഒന്നാംനിര ടാറിംഗ് നടത്തിയിട്ട് ഒരു മാസത്തിലേറെയായി. മുടങ്ങികിടക്കുന്ന ഭാഗത്തുകൂടി ഒന്നാംനിര ടാറിംഗ് നടത്തിയാല് മാത്രമെ രണ്ടാംനിര ടാറിംഗ് നടത്തി ബൈപ്പാസ് നിര്മാണം പൂര്ത്തീകരിക്കാന് കഴിയുകയുള്ളു. ബൈപ്പാസ് റോഡ് പൂര്ണമായ അര്ഥത്തില് യാഥാര്ത്ഥ്യമാകണമെങ്കില് ഇനിയും നിര്മാണ ജോലികളേറെ ബാക്കിയാണ്.
