പെരുമ്പാവൂർ: മോട്ടോർ സൈക്കിൾ മോഷ്ടാവ് വാഹന പരിശോധനക്കിടെ അറസ്റ്റിൽ. കൂവപ്പടി ഐമുറി തൊടാപ്പറമ്പ് ഭാഗത്ത് കളമത്ത് വീട്ടിൽ അനന്തു (22) വിനെയാണ് പെരുമ്പാവൂർ പോലീസ് അറസ്റ്റ് ചെയ്തത്. കഴിഞ്ഞ ദിവസം പെരുമ്പാവൂർ റിലയൻസ് മാളിന് മുൻവശം പകൽ വാഹന പരിശോധന നടത്തി വരുന്നതിനിടെ വയറുകൾ മുറിച്ച നിലയിലും താക്കോൽ ഇല്ലാതെയും ബൈക്ക് ഓടിച്ചു വന്നയാളെ ചോദ്യം ചെയ്തപ്പോഴാണ് മോഷ്ടിച്ചെടുത്ത ബൈക്കാണെന്ന് മനസ്സിലായത്. തുടര്‍ന്നുള്ള അന്വേഷണത്തില്‍ ആലുവയിലെ മോട്ടോർ ഡ്രൈവിംഗ് സ്കൂളിലെ ഇൻസ്ട്രക്ടുടെ ബൈക്ക് ഇയാൾ താമസിച്ചിരുന്ന ലോഡ്ജിന്‍റെ പോർച്ചിൽ നിന്നും പ്രതി മോഷ്ടിച്ചെടുക്കുകയായിരുന്നെന്ന്‍ തെളിഞ്ഞു.
പെരുമ്പാവൂർ, കുറുപ്പംപടി, കോതമംഗലം എന്നീ പോലീസ് സ്റ്റേഷനുകളിലെ മോഷണ കേസുകളിലെ പ്രതിയാണ് അനന്തു. അന്വേഷണ സംഘത്തിൽ ഇൻസ്പെക്ടർ ആർ.രഞ്ജിത്ത്, എസ്.ഐ കെ.എസ്.ബിനോയ്, എസ്.സി.പി.ഒ മനോജ്, സി.പി.ഒ ജെയ്ജോ ആന്‍റെണി എന്നിവരാണ് ഉണ്ടായിരുന്നത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
