കോതമംഗലം : ലോക ഹൃദയ ദിനത്തിൽ ധര്‍മ്മഗിരി ആശുപത്രിയുടെ നേതൃത്വത്തില്‍ റാലിയും റോഡ്ഷോയും നടത്തി. ആശുപത്രി അങ്കണത്തിൽ വച്ച്‌ നടന്ന ചടങ്ങിൽ ആന്‍റണി ജോൺ എം എൽ എ റാലിയും റോഡ്ഷോയും ഉദ്ഘാടനം ചെയ്തു. കത്തീഡ്രല്‍ വികാരി തോമസ്‌ ചെറുപറമ്പില്‍ അദ്ധ്യക്ഷത വഹിച്ചു. അഡ്മിനിസ്ട്രേറ്റര്‍ സിസ്റ്റര്‍ അഭയ സ്വാഗതം പറഞ്ഞു.കൗൺസിലര്‍ അഡ്വ. ജോസ്‌ വറുഗീസ് ബുക്ക്‌ ലെറ്റ്‌ പ്രകാശനം ചെയ്തു.

ചടങ്ങിൽ ഡോക്ടര്‍ മനോജ്‌ തോമസ്‌,എ പി ഇ സി ചെയര്‍മാന്‍ ജയേഷ്‌ തമ്പാൻ,ആശുപത്രി സെക്രട്ടറി മാത്യു ജോസഫ് എന്നിവർ സന്നിഹിതരായിരുന്നു.റാലിക്ക്‌ ശേഷം നടന്ന റോഡ്ഷോയില്‍ ഹൃദയ സംബന്ധമായ രോഗങ്ങളെപ്പറ്റിയും അടിയന്തിരഘട്ടത്തില്‍ ആശുപത്രിയില്‍ എത്തുന്നതു വരെ രോഗിയും കൂടെയുള്ളവരും ചെയ്യേണ്ട പ്രഥമ ശുശ്രൂഷകളെപ്പറ്റിയും ഉള്ള ബോധവത്കരണം നടന്നു.

കോതമംഗലം: സാമൂഹിക അവബോധമുള്ള വിദ്യാർത്ഥികളെ രൂപപ്പെടുത്താനുള്ള ബാധ്യത വിദ്യാഭ്യാസ സ്ഥാപനങ്ങൾക്കുണ്ടെന്ന് പരി. പാത്രിയാർക്കീസ് ബാവായുടെ മലങ്കര കാര്യ സെക്രട്ടറി മർക്കോസ് മാർ ക്രിസ്റ്റഫോറസ്. നമുക്ക് ലഭിക്കുന്ന പരിജ്ഞാനം മറ്റുള്ളവർക്ക് പകർന്ന് കൊടുക്കണം. എനിക്ക് എന്ത് ലഭിക്കുന്നു എന്നോർക്കാതെ സമൂഹത്തിന് എന്ത് നൽകാൻ കഴിയും എന്ന് ചിന്തിക്കുന്ന വിദ്യാർത്ഥികളെയാണ് നമ്മൾ രൂപപ്പെടുത്തേണ്ടത്. വിദ്യാർത്ഥികളാണ് നാളത്തെ ലോകത്തിന്റെ പുനർ നിർമ്മിതിക്ക് തയ്യാറെടുക്കുന്നവർ. അവിടെയാണ് നല്ല വിദ്യാഭ്യാസ സ്ഥാപനങ്ങളുടെ പ്രസക്തി. കോതമംഗലം മാർ അത്തനേഷ്യസ് എഞ്ചിനീയറിംഗ് കോളേജിന്റെ ഡയമണ്ട് ജൂബിലി ആഘോഷങ്ങളുടെ ലോഗോ പ്രകാശനം ചെയ്ത് സംസാരിക്കുകയായിരുന്നു അദ്ദേഹം. വിദേശത്തേയ്ക്ക് കുടിയേറുന്ന വിദ്യാർത്ഥികളുടെ എണ്ണം ക്രമാതീതമായി വർദ്ധിക്കുന്നു. അഞ്ച് വർഷത്തിനുള്ളിൽ കേരളത്തിലെ പല വീടുകളിലും താമസിക്കാൻ ആളുണ്ടാകില്ലെന്നും അദ്ദേഹം ഓർമ്മിപ്പിച്ചു.

കോളേജിലെ പൂർവ്വ വിദ്യാർത്ഥികളുടെ 14 വിദേശ രാജ്യ ചാപ്റ്ററുകളിൽ നിന്നടക്കം പൂർവ്വ വിദ്യാർത്ഥികൾ പങ്കെടുക്കുന്ന ‘ഗ്ലോബൽ അലുമ്നി മീറ്റ്’, ഇന്റർനാഷണൽ കോൺഫറൻസുകൾ, ദേശീയ തലത്തിലുള്ള സെമിനാറുകൾ ടെക്നിക്കൽ ഫെസ്റ്റ്, എക്സിബിഷൻ, വിവിധ കൾചറൻ പ്രോഗ്രാമുകൾ, തുടങ്ങി വിപുലമായ പരിപാടികൾ ആണ് ഒരു വർഷം നീണ്ടു നിൽക്കുന്ന ഡയമണ്ട് ജൂബിലി ആഘോഷങ്ങളുടെ ഭാഗമായി സംഘടിപ്പിച്ചിരിക്കുന്നത്. 1961 ൽ 120 വിദ്യാർത്ഥികളും 30 ജീവനക്കാരുമായി ആരംഭിച്ച ഏഷ്യയിലെ ആദ്യ ക്രിസ്റ്റ്യൻ എഞ്ചിനീയറിംഗ് കോളേജിൽ ഇന്ന് 2700 വിദ്യാർത്ഥികളും 300 ജീവനക്കാരും ഉണ്ട്. തുടക്കത്തിൽ സിവിൽ, മെക്കാനിക്കൽ, ഇലക്ട്രിക്കൽ എന്നീ 3 ബ്രാഞ്ചു കൾ മാത്രമുണ്ടായിരുന്ന കോളേജിൽ ഇന്ന് 7 എഞ്ചിനീയറിംഗ് ബിരുദ കോഴ്സു കളും 8 ബിരുദാനന്തര കോഴ്സുകളും പിഎച്ച്ഡി ബിരുദത്തിനായുള്ള റിസർച്ച് സൗകര്യങ്ങളും ഉണ്ട്.

കോളേജിലെ പൂർവ്വ വിദ്യാർത്ഥി കൂടിയായ, നവാഭിഷിക്തനായ മർക്കോസ് മാർ ക്രിസ്റ്റഫോറസ് മെത്രാപ്പോലീത്തയ്ക്ക് കോളേജിൽ വിപുലമായ സ്വീകരണവും നൽകി. ചടങ്ങിൽ എം. എ കോളേജ് അസ്സോസ്സിയേഷൻ സെക്രട്ടറി ഡോ. വിന്നി വർഗീസ്, വൈസ് ചെയർമാൻ എ. ജി ജോർജ്ജ്, പ്രിൻസിപ്പൽ ഡോ. ബോസ് മാത്യു ജോസ്, ഡോ. സോണി കുര്യാക്കോസ്, പ്രൊഫ. നീന സണ്ണി, ഡോ. കെ എം ലൗലി, ഡോ. സണ്ണി കെ ജോർജ്ജ്, അഭിറാം ജി, പ്രൊഫ. ബൈബിൻ പോൾ എന്നിവർ സംസാരിച്ചു.

കോതമംഗലം : സമഗ്ര ശിക്ഷാ കേരളം കോതമംഗലം ബി ആർ സി യുടെ നേതൃത്വത്തിൽ കോതമംഗലം ബി ആർ സി പരിധിയിലുള്ള എൽ പി,യു പി,ഹൈസ്ക്കൂൾ,ഹയർ സെക്കണ്ടറി വിഭാഗങ്ങളിലെ എല്ലാ അധ്യാപകർക്കും സംസ്ഥാന സർക്കാരിന്റെ ‘ലഹരി വിമുക്ത’ അധ്യാപക പരിശീലനം സെപ്തംബർ 27 മുതൽ 30 വരെ സംഘടിപ്പിക്കുന്നു. കുട്ടികൾക്കും രക്ഷിതാക്കൾക്കും അധ്യാപകർക്കും പൊതു സമൂഹത്തിനും ലഹരി വിമുക്ത സന്ദേശം ലഭ്യമാക്കുക എന്ന ലക്ഷ്യം മുൻ നിർത്തി നടപ്പിലാക്കുന്ന പരിശീലനത്തിന്റെ ഉദ്‌ഘാടനം സെന്റ് ജോർജ്ജ് ഹയർ സെക്കണ്ടറി സ്ക്കൂളിൽ വച്ച് ആന്റണി ജോൺ എം എൽ എ നിർവ്വഹിച്ചു.സെന്റ് ജോർജ്ജ് ഹയർ സെക്കണ്ടറി സ്കൂൾ പ്രിൻസിപ്പാൾ ബിജു ജോസഫ് അധ്യക്ഷത വഹിച്ച യോഗത്തിൽ ബി ആർ സി ബ്ലോക്ക് പ്രോജക്ട് കോർഡിനേറ്റർ സജീവ് കെ ബി സ്വാഗതവും ബി ആർ സി ട്രെയ്നർ ജോബി ജോൺ നന്ദിയും പറഞ്ഞു.

എൽ പി,യു പി വിഭാഗം അധ്യാപകർക്കുള്ള പരിശീലനം ബി ആർ സി ഹാളിലും ഹൈസ്ക്കൂൾ വിഭാഗം കോതമംഗലം സെന്റ് ജോർജ് ഹയർ സെക്കണ്ടറി സ്കൂളിലും ഹയർ സെക്കണ്ടറി വിഭാഗം കോതമംഗലം മാർ ബേസിൽ ഹയർ സെക്കണ്ടറി സ്കൂളിലും നടന്നു വരുന്നു.സബ് ജില്ലയിലെ 1400 ൽ പരം അധ്യാപകർ പരിശീലനത്തിൽ പങ്കെടുക്കും.സ്ക്കൂൾ തല പരിശീലനം ഒക്ടോബർ 2 മുതൽ നവംബർ ഒന്നു വരെ നീണ്ടു നിൽക്കുന്ന ബൃഹത്തായ പദ്ധതിയാണ്.