മൂവാറ്റുപുഴ: മാറാടി മഞ്ചേരിപ്പടിയില് തനിച്ച് താമസിക്കുന്ന കിടപ്പുരോഗിയായ വയോധികയുടെ ആഭരണങ്ങൾ കവർന്ന കേസിലെ പ്രതികൾ അറസ്റ്റിൽ. തമിഴ്നാട് മധുര സ്വദേശിനി സുധ ശങ്കർ (38), ദിണ്ടുഗൽ സ്വദേശിനി ലക്ഷ്മി (46) എന്നിവരെയാണ് മൂവാറ്റുപുഴ ഡിവൈഎസ്പി അബ്ദുൾ മുനീർ പി.യുടെ നേതൃത്വത്തിലുള്ള അന്വേഷണ സംഘം അറസ്റ്റ് ചെയ്തത്. ഞായറാഴ്ച രാവിലെ 8:30 കേസിനാസ്പദമായ സംഭവം.
വയോധികയുടെ വീട്ടിൽ ഹോം നഴ്സായി ജോലി ചെയ്തിരുന്ന സുധ ശങ്കർ, സുഹൃത്തായ ലക്ഷ്മിയുമായി ചേർന്ന് ആസൂത്രണം ചെയ്ത് മോഷണം നടത്തുകയായിരുന്നു. അന്വേഷണം വഴിതെറ്റിക്കാൻ ഹോം നഴ്സ് സാങ്കൽപിക കഥകൾ മെനഞ്ഞെങ്കിലും മൂവാറ്റുപുഴ പോലീസ് പ്രതികളെ തിരിച്ചറിയുകയായിരുന്നു.പ്രതികളെ സംഭവസ്ഥലത്ത് എത്തിച്ചു തെളിവെടുപ്പ് നടത്തി. മോഷണം നടത്തിയ സ്വർണ്ണാഭരണങ്ങൾ പ്രതികളിൽ നിന്നും കണ്ടെടുത്തു.
ഇൻസ്പെക്ടർ അനിൽ ജോർജ്ജ്, എസ്.ഐമാരായ എൻ.എസ്. റോയ്, ചാർലി തോമസ്, എസ്. ശ്രീനാഥ്, പി.സി. ജയകുമാർ, എം.എം. ഉബൈസ്, സി.ബി. അനിൽകുമാർ, എ.എസ്.ഐമാരായ എം.കെ. ഗിരിജ, എ.വി. ദിനി, സീനിയർ സിവിൽ പോലീസ് ഓഫീസർമാരായ ഹാരിസ് എച്ച്., രതീഷ് എം.പി., ശ്രീജു രാജൻ, ബിനിൽ എൽദോസ്, അജേഷ് എ.പി. എന്നിവരും അന്വേഷണ സംഘത്തിൽ ഉണ്ടായിരുന്നു. പ്രതികളെ കസ്റ്റഡിയിൽ വാങ്ങി കൂടുതൽ അന്വേഷണം നടത്താനാണ് പോലീസിന്റെ തീരുമാനം.
