കോതമംഗലം: ഗാന്ധിജയന്തി ദിനത്തോടനുബന്ധിച്ച് “മാലിന്യമുക്ത നവകേരളം” ക്യാമ്പിന്റെ ഭാഗമായി കോതമംഗലം നഗരസഭയുടെ നേതൃത്വത്തിൽ ശുചീകരണ യജ്ഞം സംഘടിപ്പിച്ചു.കന്നി ഇരുപത് പെരുന്നാൾ കൂടി നടക്കുന്ന സാഹചര്യത്തിൽ ഹരിത കർമ്മ സേനാംഗങ്ങൾ, എൻഎസ്എസ് വോളണ്ടിയർമാർ,നഗരസഭയുടെ ശുചീകരണ തൊഴിലാളികളടക്കം അടങ്ങുന്ന ഒരു വിപുലമായ ശുചീകരണ യജ്ഞമാണ് കോതമംഗലത്ത് സംഘടിപ്പിച്ചത്. ആന്റണി ജോൺ എം എൽ എ ഉദ്ഘാടനം ചെയ്തു.മുനിസിപ്പൽ ചെയർമാൻ കെ കെ ടോമി അധ്യക്ഷത വഹിച്ചു.മുനിസിപ്പൽ കൗൺസിലർ മാരായ കെ വി തോമസ്, ഭാനുമതി രാജു,ഷിബു കുര്യാക്കോസ് എന്നിവർ ചടങ്ങിൽ പങ്കെടുത്തു.

പെരുമ്പാവൂർ : ഉയർന്ന നിലവാരത്തിൽ 2.57 കോടി രൂപാ ചിലവഴിച്ച് പുനർ നിർമ്മാണം പൂർത്തിയാക്കിയ റയോൺപുരം പാലത്തിന്റെയും , സംസ്ഥാന ബജറ്റിൽ ഈ വർഷം 5 കോടി രൂപാ വകയിരുത്തിയ പെരുമ്പാവൂർ -കൂവപ്പടി റോഡിന്റെ നിർമ്മാണത്തിന്റെയും , 1.4 കോടി ചിലവഴിച്ച് നിർമ്മിക്കുന്ന മൂവാറ്റുപുഴ പാണിയേലി റോഡിന്റെ നിർമ്മാണത്തിന്റേയും ഉദ്ഘാടനം ചേരാനല്ലൂർ ഗവ. ഹയർ സെക്കണ്ടറി സ്കൂളിൽ എൽദോസ് കുന്നപ്പിള്ളി എം.എൽ.എ യുടെ അധ്യക്ഷതയിൽ ചേർന്ന യോഗത്തിൽ പൊതുമരാമത്ത് ടൂറിസം വകുപ്പ് മന്ത്രി പി.എ.മുഹമ്മദ് റിയാസ് നിർവഹിച്ചു. പത്തോളം പദ്ധതികളിലായി ഏകദേശം നാല്പതു കോടി രൂപയുടെ പൊതുമരാമത്ത് പണികളാണ് ഈ വർഷം പെരുമ്പാവൂരിൽ നടക്കുന്നത്

ഇതിനോടകം നിർമാണം പൂർത്തീയാക്കിയ റോഡുകളുടെ പരിപാലനത്തിനായി റണ്ണിങ് കോൺട്രാക്ട് വ്യവസ്ഥയിൽ പദ്ധതി രൂപീകരിച്ചിട്ടുണ്ടെന്നും പെരുമ്പാവൂർ മണ്ഡലത്തിലെ തോട്ടുവാ നമ്പിള്ളി റോഡ്, കുറിച്ചിലകോട് ജംഗ്ഷന്റെ നവീകരണം, കടുവാളിൽ നിന്ന് എയർപോർട്ടിലേക്കുള്ള റോഡ് എന്നിവക്ക് ആവശ്യമായ തുകയും അനുവദിക്കുന്ന കാര്യം പരിഗണിക്കാമെന്നും , റോഡുകളുടെ വികസന കാര്യത്തിൽ രാഷ്ട്രീയം മറന്ന് ഒന്നിച്ചു നീങ്ങുമെന്നും പൊതുമരാമത്ത് വകുപ്പ് മന്ത്രി യോഗത്തിൽ പറഞ്ഞു.

ചാലക്കുടി എം.പി ബെന്നി ബഹന്നാൻ മുഖ്യാതിഥിയായി പങ്കെടുത്ത യോഗത്തിൽ മുൻ എംഎൽഎ സാജു പോൾ, ബാബു ജോസഫ്, കൂവപ്പടി ബ്ലോക്ക് പ്രസിഡന്റ് ബേസിൽ പോൾ, പഞ്ചായത്ത് പ്രസിഡന്റുമാരായ സിന്ധു അരവിന്ദ്, പി.പി. അവറാച്ചൻ , ജില്ലാ പഞ്ചായത്ത് മെമ്പർ മനോജ് മൂത്തേടൻ, തുടങ്ങിയവരും , ത്രിതല പഞ്ചായത്ത് ജനപ്രതിനിധികളും, രാഷ്ട്രീയ കക്ഷി പ്രതിനിധികളും, പൊതുമരാമത്ത് എക്സിക്യൂട്ടീവ് എഞ്ചിനീയർ നീന സൂസൻ പുന്നൻ എന്നിവരും പങ്കെടുത്തു.

കോതമംഗലം : കന്നി ഇരുപത് പെരുന്നാൾ പ്രമാണിച്ച് തീർത്ഥാടകർക്കായി നാട്ടുകാരുടെ നേതൃത്വത്തിൽ കോതമംഗലം ബേസിൽ സ്കൂളിന് സമീപത്ത് നേർച്ച കഞ്ഞി വിതരണം സംഘടിപ്പിച്ചു. 11 വർഷമായി മുടങ്ങാതെ പ്രദേശത്തെ ഒരു കൂട്ടം ചെറുപ്പക്കാരുടെ നേതൃത്വത്തിലാണ് കന്നി പത്തൊമ്പതാം തീയതി എല്ലാ വർഷവും 10000 കണക്കിന് ഭക്തജനങ്ങൾക്ക് നേർച്ച കഞ്ഞി വിതരണം നടത്തിവരുന്നത്.ഈ പ്രാവശ്യവും മുടക്കം കൂടാതെ നേർച്ച കഞ്ഞി വിതരണം സംഘടിപ്പിച്ചു. ബേസിൽ സ്കൂളിന് സമീപത്ത് പ്രത്യേകം തയ്യാറാക്കിയ പന്തലിൽ ആന്റണി ജോൺ എംഎൽഎ നേർച്ച കഞ്ഞി വിതരണത്തിന്റെ ഉദ്ഘാടനം നിർവഹിച്ചു. മുനിസിപ്പൽ ചെയർമാൻ കെ കെ ടോമി അധ്യക്ഷത വഹിച്ചു. മുനിസിപ്പൽ കൗൺസിലർമാരായ കെ വി തോമസ്, എ ജി ജോർജ്, ഭാനുമതി രാജു,സജി ജോർജ്,അജി കാട്ടുചിറ എന്നിവർ ചടങ്ങിൽ സന്നിഹിതരായിരുന്നു.