കൈ​ക്കൂ​ലി : പ​ഞ്ചാ​യ​ത്ത് സെ​ക്ര​ട്ട​റി​ക്കും ക്ല​ർ​ക്കി​നു​മെ​തി​രെ ന​ട​പ​ടി​ക്ക് ശി​പാ​ർ​ശ

കോതമംഗലം: മണ്ണ് ഇടപാടുകാരില്‍ നിന്നും കൈക്കൂലി വാങ്ങിയതായി കണ്ടെത്തിയ നെല്ലിക്കുഴി പഞ്ചായത്ത് സെക്രട്ടറിക്കും സീനിയര്‍ ക്ലര്‍ക്കിനുമെതിരെ നടപടിക്ക് ശിപാര്‍ശ ചെയ്ത് പഞ്ചായത്ത് കമ്മറ്റി. ഓപ്പറേഷന്‍ എര്‍ത്ത് ഗാര്‍ഡ് എന്ന പേരില്‍ സംസ്ഥാന വ്യാപകമായി വിജിലന്‍സ് നടത്തിയ മിന്നല്‍ പരിശോധനയിലാണ് മണ്ണ് ഇടപാടുകാരില്‍ നിന്നും അപേക്ഷകരില്‍നിന്നുമായി തദ്ദേശഭരണ വകുപ്പുകളിലെ 14 ഉദ്യോഗസ്ഥര്‍ ഗൂഗിള്‍ പേ വഴി 4,69,800 രൂപ കൈക്കൂലി വാങ്ങിയതായി മൈനിംഗ് ആന്‍ഡ് ജിയോളജി വകുപ്പ് കണ്ടെത്തിയത്.

ഇതില്‍ നെല്ലിക്കുഴി പഞ്ചായത്ത് സെക്രട്ടറി 19,500 രൂപയും സീനിയര്‍ ക്ലര്‍ക്ക് 43,000 രൂപയും യുപിഐ ഇടപാടിലൂടെ കൈപ്പറ്റിയതായും ഉണ്ട്. കഴിഞ്ഞ 20നാണ് സംസ്ഥാന വ്യാപകമായി മൈനിംഗ് ആന്‍ഡ് ജിയോളജി ജില്ലാ ഓഫീസുകളിലും തെരഞ്ഞെടുത്ത തദ്ദേശ സ്ഥാപനങ്ങളിലുമായി ആകെ 72 ഇടങ്ങളില്‍ പരിശോധന നടത്തിയത്. ചട്ടവിരുദ്ധമായി മണ്ണ് നീക്കം ചെയ്യപ്പെട്ടതായി വിവരം ലഭിച്ച 360 സ്ഥലങ്ങളിലും പരിശോധന നടത്തി.

രണ്ടു ജീവനക്കാര്‍ക്കെതിരെ കേസെടുത്ത സാഹചര്യത്തില്‍ നെല്ലിക്കുഴി പഞ്ചായത്ത് കമ്മറ്റി 24ന് അടിയന്തര യോഗം വിളിച്ചുചേര്‍ത്താണ് നടപടിക്ക് ശിപാര്‍ശ ചെയ്തത്.കേസിന്റെ നിജസ്ഥിതി അന്വേഷിച്ച് കുറ്റക്കാരെങ്കില്‍ നടപടി എടുക്കുവാനും അതുവരെ ജീവനക്കാരെ മാറ്റിനിര്‍ത്താനും പഞ്ചായത്ത് ഡയറക്ടറോടും ജോയിന്റ് ഡയറക്ടറോടും ആവശ്യപ്പെട്ട് കത്ത് കൈമാറി. പ്രസിഡന്റ് സനീറ നസീര്‍ അധ്യക്ഷത വഹിച്ചു.