കൊച്ചി : തമിഴ് സൂപ്പർ താരം സൂര്യക്ക് ജന്മദിന സമ്മാനമായി മൂക്ക് കൊണ്ട് ആറടി ഉയരവും, നാലര അടി വീതിയിലുമുള്ള ചിത്രം വരച്ച് കുട്ടികലാകാരൻ. മൂക്ക് കൊണ്ട് “ക്ഷ” വരപ്പിക്കും എന്ന് പൊതുവേ ഒരു ചൊല്ലുണ്ട്. എന്നാല്‍ അതിനെ മറികടന്നു കൊണ്ട് ഒരു ചിത്രം തന്നെ വരച്ചിരിക്കുയാണ് ഇന്ദ്രജിത്ത് എന്ന പ്ലസ് വണ്‍ വിദ്യാര്‍ഥി. കൈ വിരലുകള്‍ കൊണ്ട് പ്രശസ്ത ചലച്ചിത്ര താരം ടോവിനോ തോമസിനെയും, കാല്‍ വിരലുകള്‍ കൊണ്ട് തമിഴ് സൂപ്പർ താരം ദളപതി വിജയ് യുടെ ചിത്രവും വരച്ച ഇന്ദ്രജിത്ത് മൂക്ക് കൊണ്ട് പുതിയ ചിത്ര രചനാ രീതി കൊണ്ടുവന്നിരിക്കയാണ് . എന്നാൽ കൈവിരലും കാല്‍ വിരലും കൊണ്ട് വരയ്ക്കുന്ന തു പോലെ അത്ര എളുപ്പമല്ല മൂക്ക് കൊണ്ട് വരക്കുന്നത് എന്ന് ഈ കുട്ടി കലാകാരൻ പറയുന്നു.
സൂക്ഷിച്ചില്ലെങ്കില്‍ തൊലി ഉരഞ്ഞു തീരാന്‍ സാധ്യത ഉണ്ട്. അതുകൊണ്ട് വേണ്ടത്ര മുന്‍കരുതലുകള്‍ ഇല്ലാതെ ചിത്രം വരക്കുന്നത് മൂക്കിനു ക്ഷതം സംഭവിക്കാന്‍ സാധ്യതയുണ്ട്.
ചിത്രം വരയ്ക്കുന്ന ആറടി വലുപ്പമുള്ള ബോര്‍ഡില്‍ പോളിഫോം സ്പോഞ്ച് ഒട്ടിച്ചു അതിനു മുകളില്‍ തുണിയില്‍ ആണ് രണ്ടു ദിവസം കൊണ്ട് ഈ ചിത്രം ഇന്ദ്രജിത് വരച്ചത്.1975 ലാണ് സൂര്യയുടെ ജനനം. 46 വയസ് പിന്നിടുന്ന സൂര്യയുടെ ജന്മദിനമായ നാളെ ( ജൂലായ്‌ 23)കൊടുങ്ങല്ലൂര്‍ സൂര്യ ഫാന്‍സിന്‍റെ ആഗ്രഹപ്രകാരം ജന്മദിന സമ്മാനമായാണ് ഇന്ദ്രജിത്ത് ഈ ചിത്രം വ്യത്യസ്തമായി ചെയ്യാന്‍ തീരുമാനിച്ചത്.
നിരവധി മീഡിയങ്ങളില്‍ ചിത്രങ്ങള്‍ വരയ്ക്കുന്ന പ്രശസ്ത ശില്പിയും, ചിത്രകാരനുമായ ഡാവിഞ്ചി സുരേഷിന്‍റെ മകനായ ഇന്ദ്രജിത്ത് ചിത്ര രചനാ രീതികളില്‍ വ്യത്യതമായ മേഖലകള്‍ തേടുകയാണ്. അക്രിലിക് കളറുകള്‍ ആണ് ആറടി ഉയരവും നാലര അടി വീതിയും വലുപ്പമുള്ള ഈ ചിത്രം വരക്കാന്‍ ഉപയോഗിച്ചത്.
