കോതമംഗലം: കോവിഡ് സാമ്പത്തിക പാക്കേജിന്റെ ഭാഗമായി ക്ഷേമപെൻഷൻ ഉൾപ്പെടെ ഒരു ധനസഹായവും ലഭിക്കാത്ത ബി പി എൽ അന്ത്യോദയ കാർഡുടമകൾക്കായി സംസ്ഥാന സർക്കാർ പ്രഖ്യാപിച്ച 1000 രൂപയുടെ ധനസഹായത്തിന് കോതമംഗലം മണ്ഡലത്തിൽ 10385 പേരാണ് അർഹരായിട്ടുള്ളതെന്ന് ആന്റണി ജോൺ എംഎൽഎ അറിയിച്ചു. കവളങ്ങാട് പഞ്ചായത്ത് 1362,കീരംപാറ പഞ്ചായത്ത് 661, കുട്ടമ്പുഴ പഞ്ചായത്ത് 2469,കോട്ടപ്പടി പഞ്ചായത്ത് 692,നെല്ലിക്കുഴി പഞ്ചായത്ത് 1681,പല്ലാരിമംഗലം പഞ്ചായത്ത് 804,പിണ്ടിമന പഞ്ചായത്ത് 735,വാരപ്പെട്ടി പഞ്ചായത്ത് 620,കോതമംഗലം മുൻസിപ്പാലിറ്റി 1361 എന്നിങ്ങനെ 10385 പേരുടെ ലിസ്റ്റാണ് നിലവിൽ തയ്യാറാക്കിയിട്ടുള്ളത്.
സാമൂഹ്യ സുരക്ഷ പെൻഷനോ,ക്ഷേമ പെൻഷനോ,ധന സഹായമോ ലഭിക്കാത്ത ബി പി എൽ അന്ത്യോദയ കാർഡുടമകൾക്കാണ് ധനസഹായം ലഭിക്കുന്നത്. റേഷൻ കാർഡ് ഇല്ലാത്തവർ ഈ പദ്ധതിയുടെ പരിധിയിൽ വരില്ല. ഗുണഭോക്താക്കളുടെ പട്ടിക റേഷൻ കടകളിലും,ബന്ധപ്പെട്ട തദ്ദേശ ഭരണ സ്ഥാപനങ്ങളിലും ലഭ്യമാക്കുവാനാണ് ഉദ്ദേശിക്കുന്നത്. അർഹരായവർക്ക് സഹകരണ ബാങ്ക് ജീവനക്കാർ വീട്ടിലെത്തി പണം കൈമാറും. ധനകാര്യ വകുപ്പ് നൽകിയ പത്ര പരസ്യത്തിൽ ചേർത്തിട്ടുള്ള സത്യപ്രസ്താവന പൂരിപ്പിച്ച് ഒപ്പിട്ട് ബാങ്ക് ജീവനക്കാരെ ഏൽപ്പിക്കണം.
പണം വിതരണം നടത്തുന്നതുമായി ബന്ധപ്പെട്ട ചെലവ് സംസ്ഥാന സർക്കാരാണ് വഹിക്കുന്നതെന്നും,ഗുണഭോക്താവ് യാതൊരു വിധത്തിലുള്ള തുകയും നൽകേണ്ടതില്ലെന്നും,ധന സഹായത്തിന് ആവശ്യമായിട്ടുള്ള തുക മുഖ്യമന്ത്രിയുടെ ദുരിതാശ്വാസ നിധിയിൽ നിന്നുമാണ് അനുവദിച്ചിട്ടുള്ളതെന്നും എംഎൽഎ കൂട്ടിച്ചേർത്തു.
