കോതമംഗലം : അറിവുകൊണ്ടും അലിവുകൊണ്ടും ഗാംഭീര്യം കൊണ്ടും സ്നേഹം കൊണ്ടും വിദ്യാർത്ഥികളുടെ മനസ്സിലും കോതമംഗലത്തും തിലകക്കുറിയായി സ്ഥാനം പിടിച്ചുപറ്റിയ അദ്ധ്യാപകനാണ് എസ്.എം അലിയാർ. അധ്യായനത്തിനപ്പുറമുള്ള സൗഹൃദത്തിന്റെ സർഗ്ഗാത്മകമായ ലോകത്തിലേക്ക് നടന്നു പോകുമ്പോൾ വിദ്യാർത്ഥികൾക്കുവേണ്ടിയും, ജോലി ചെയ്ത സ്കൂളുകൾക്ക് വേണ്ടിയും അഹോരാത്രം പ്രയത്നിച്ച അദ്ധ്യാപകൻ.
അനേകം തലമുറകൾക്ക് അറിവിന്റെ അമൃതാക്ഷരി നുകർന്ന് നൽകിയ സ്നേഹനിധിയായ അലിയാർ മാഷ് ക്ലാസ്സ് മുറിക്കകത്തും പുറത്തും വിദ്യാര്‍ത്ഥിയുടെ ജീവിതത്തിലും ശക്തിയേറുന്ന പ്രതിഫലനങ്ങളാണ് ചെലുത്തുയിരുന്നത്. ഒരു സമൂഹത്തിന്റെ ഭാഗഥേയം നിര്‍ണയിക്കാന്‍ വിദ്യാലയങ്ങളിലെത്തുന്നവന്റെ മുന്നില്‍ വിദ്യയുടെ അനന്തസാഗരത്തിനൊപ്പം സ്വഭാവത്തിന്റെ വിശാല വിഹായസും തുറന്നുകൊടുക്കാന്‍ ഇദ്ദേഹത്തിന് കഴിഞ്ഞു.
കോതമംഗലത്തിന്റെ സമഗ്ര വിദ്യഭ്യാസ പുരോഗതിക്ക് വേണ്ടി പ്രവർത്തിക്കുന്ന ആന്റണി ജോൺ എം.എൽ.എയുടെ ” KITE ” പദ്ധതിയുടെ കോഡിനേറ്റർ കൂടിയായിരുന്നു അലിയാർ മാഷ്. സുദീർഘമായ സർക്കാർ സേവനത്തിന് ശേഷം ഔദ്യോഗികമായി വിരമിക്കുന്ന മാഷിന് എല്ലാ വിധ ആശംസകളും ആദ്യം നേരുന്നതായും, സർക്കാർ സേവനത്തിന് ഉപരിയായി സഹജീവികളോട് കരുണ കാണിക്കാനും പൊതു സമൂഹത്തോടൊപ്പം നിന്ന് നാടിന്റെ വികസന പ്രക്രിയയിൽ പങ്കാളിയായി മറ്റുള്ളവർക്ക് പ്രചോചനം നൽകുന്ന രീതിയിൽ പ്രവർത്തിക്കാനും അലിയാർ മാഷിന് കഴിഞ്ഞിട്ടുണ്ട് എന്ന് ആന്റണി ജോൺ എം.എൽ.എ അഭിപ്രായപ്പെട്ടു. കോതമംഗലം ബ്ലോക്ക് റിസോഴ്സ് സെന്ററിൽ വെച്ച് ആന്റണി ജോൺ എം.എൽ.എ അലിയാർ മാഷിനെ പൊന്നാട അണിയിച്ചു ആദരിച്ചു.
