പോത്താനിക്കാട് : പ്രായപൂര്‍ത്തിയാകാത്ത പെണ്‍കുട്ടിയെ വിവാഹ വാഗ്ദാനം നല്‍കി പീഡിപ്പിച്ച കേസില്‍ ഒരു വര്‍ഷത്തോളമായി ഒളിവിലായിരുന്ന പ്രതിയെ പോത്താനിക്കാട് പോലീസ് അറസ്റ്റു ചെയ്തു. വിവാഹിതനും രണ്ടു കുട്ടികളുടെ അച്ഛനുമായ എറണാകുളം മട്ടാഞ്ചേരി ജന്മപറമ്പില്‍ അരുണ്‍ (23) നെയാണ് അറസ്റ്റു ചെയ്തത്. 2018 ഡിസംബറിലായിരുന്നു കേസിനാസ്പദമായ സംഭവം. പെണ്‍കുട്ടിയുടെ പരാതിയെ തുടര്‍ന്ന് ഒരു വര്‍ഷത്തോളമായി ഇയാള്‍ ഒളിവിലായിരുന്നു.
മൂവാറ്റുപുഴ ഡിവൈഎസ്പിയ്ക്കു ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ പോത്താനിക്കാട് പോലീസ് ഇന്‍സ്പെക്ടര്‍ നോബിള്‍ മാനുവല്‍, അസിസ്റ്റന്‍റ് എസ്ഐ അഷ്റഫ്, സീനിയര്‍ സിപിഒമാരായ സലിം, രാജേഷ് എന്നിവരുടെ നേതൃത്വത്തില്‍ കഴിഞ്ഞ ദിവസം തമിഴ്നാട് നാഗപട്ടണത്തുനിന്നാണ് പ്രതിയെ അറസ്റ്റു ചെയ്തത്. ഇയാള്‍ ഇവിടെ തമിഴ് സ്ത്രീയെ വിവാഹം ചെയ്ത് സേവ്യര്‍ എന്ന വ്യാജപേരില്‍ ഒളിവില്‍ കഴിയുന്നതിനിടെയാണ് പോലീസിന്‍റെ പിടിയിലായത്.
