കോതമംഗലം: സമൂഹത്തിലെ എല്ലാ വിഭാഗം ജനങ്ങള്ക്കും ഭക്ഷ്യസുരക്ഷ ഉറപ്പാക്കുകയെന്ന ലക്ഷ്യത്തോടെ സംസ്ഥാന ഭക്ഷ്യ പൊതുവിതരണ ഉപഭോക്തൃകാര്യ വകുപ്പിന്റെ നേതൃത്വത്തില് ഗോത്രവര്ഗ ഉന്നതിയിലേക്ക് സഞ്ചരിക്കുന്ന റേഷന് കടയെത്തിക്കുന്ന പദ്ധതിക്ക് എറണാകുളം ജില്ലയില് തുടക്കമായി. സര്ക്കാരിന്റെ 100 ദിന കര്മ്മ പരിപാടിയുടെ ഭാഗമായാണ് പദ്ധതി നടപ്പാക്കുന്നത്. കുട്ടമ്പുഴ പഞ്ചായത്തിലെ താളുകണ്ടം ഗോത്രവര്ഗ ഉന്നതിയിലാണ് സഞ്ചരിക്കുന്ന റേഷന് അടക്കമുള്ള ഭക്ഷ്യസാധനങ്ങള് ഉള്പ്പെടെയുള്ള അവശ്യസാധനങ്ങള് സപ്ലൈ ഡിപ്പാര്ട്ട്മെന്റ് നേതൃത്വത്തില് ഉന്നതിയില് എത്തിച്ച് വിതരണം ചെയ്യുന്നതിലൂടെ പിന്നാക്ക വിഭാഗങ്ങള്ക്ക് റേഷന് സൗകര്യം കൂടുതല് എളുപ്പത്തില് ലഭ്യമാക്കുകയാണ് പദ്ധതിയുടെ ലക്ഷ്യം.
വടാട്ടുപാറ മിനി സ്റ്റേഡിയത്തില് നടന്ന ജില്ലാതല ഉദ്ഘാടനവും സഞ്ചരിക്കുന്ന റേഷന് കടയുടെ ഫ്ലാഗ് ഓഫും ഭക്ഷ്യ പൊതുവിതരണ വകുപ്പ് മന്ത്രി അനൂപ് ജേക്കബ് നിര്വഹിച്ചു.ഷിബു തെക്കുംപുറം എംഎല്എ അധ്യക്ഷത വഹിച്ചു. ഡീന് കുര്യാക്കോസ് എംപി മുഖ്യാതിഥിയായി പങ്കെടുത്തു.
കുട്ടമ്പുഴ പഞ്ചായത്ത് പ്രസിഡന്റ് മേരി കുര്യാക്കോസ്, വൈസ് പ്രസിഡന്റ് എല്ദോസ് ബേബി, ബ്ലോക്ക് പഞ്ചായത്ത് സ്റ്റാന്ഡിങ് കമ്മിറ്റി ചെയര്പേഴ്സണ് ബിന്സി മോഹന്, പഞ്ചായത്ത് അംഗങ്ങളായ കവിത സി.കെ., സല്മ ഷാനവാസ്, എം.കെ. രാമചന്ദ്രന്, ഭാഗ്യലക്ഷ്മി രാജന്, കേരള കോണ്ഗ്രസ് (ജേക്കബ്) നേതാക്കളായ ഇ.എം. മൈക്കിള്, മാത്യു ജോസഫ്, ആന്റണി പാലക്കുഴി, മുസ്ലീം ലീഗ് നേതാവ് അലി കൂട്ടംകുളം തുടങ്ങിയവര് പങ്കെടുത്തു.
