കോതമംഗലം: യുവാവിനെ കൊലപ്പെടുത്താന്‍ ശ്രമിച്ച കേസില്‍ ഒളിവില്‍ കഴിഞ്ഞിരുന്ന സഹോദരങ്ങള്‍ അറസ്റ്റില്‍. ചെറുവട്ടൂര്‍ കുരുവിനാംപാറ പാലക്കാട്ട് അനസ് (38), സഹോദരന്‍ അജിംസ് (38) എന്നിവരെയാണ് കോതമംഗലം പോലീസ് അറസ്റ്റ് ചെയ്തത്. കഴിഞ്ഞ ജൂണ്‍ 23ന് മാതിരപ്പിള്ളി ഇഞ്ചൂര്‍ പാലത്തിന് സമീപമായിരുന്നു കേസിനാസ്പതമായ സംഭവം.
പരിക്കേറ്റ യുവാവും സുഹൃത്തും സഞ്ചരിച്ചിരുന്ന മോട്ടോര്‍ സൈക്കളിന് തടഞ്ഞ് നിര്‍ത്തി പ്രതികള്‍ വാക്കത്തി കൊണ്ട് വെട്ടിപ്പരിക്കേല്‍പ്പിക്കുകയായിരുന്നു. വാഹന് കടന്നുപോകാന്‍ വഴി നല്‍കുന്നത് സംബന്ധിച്ച് ഇവര്‍ തമ്മില്‍ മുന്‍പ് വാക്ക് തര്‍ക്കം ഉണ്ടായിരുന്നു. ഇതിലുള്ള വൈരാഗ്യമാണ് ആക്രമണ കാരണമെന്ന് പോലീസ് പറഞ്ഞു. സംഭവ ശേഷം സഹോദരങ്ങള്‍ തമിഴ്‌നാട് ഉള്‍പ്പെടെ വിവിധ സംസ്ഥാനങ്ങളില്‍ ഒളിവില്‍ കഴിയുകയായിരുന്നു.
കോതമംഗലം പോലീസ് സ്റ്റേഷനിലെ റൗഡി ലിസ്റ്റില്‍ ഉള്‍പ്പെട്ടിട്ടുള്ളവരാണ് ഇരുവരും. അനസിനെതിരെ കോതമംഗലം, പോത്താനിക്കാട് പോലീസ് സ്റ്റേഷനുകളിലായി വേറെയും കേസുകള്‍ ഉണ്ട്. കോതമംഗലം പോലീസ് സ്റ്റേഷനിലെ വേറെ രണ്ട് കേസുകളില്‍ ഉള്‍പ്പെട്ടിട്ടുള്ളയാളാണ് അജിംസ്. ഇന്‍സ്‌പെക്ടര്‍ പി.ജെ.കുര്യാക്കോസ്, എസ് ഐ അജികുമാര്‍, എ എസ് ഐ എല്‍ദോസ് അബ്രഹാം, എസ് സി പി ഒ പ്രവീണ്‍, സി പി ഒ ദയേഷ് എന്നിവരാണ് അന്വേഷണസംഘത്തില്‍ ഉണ്ടായിരുന്നത്.
