കോതമംഗലം: മാർ അത്തനേഷ്യസ് കോളേജ് ഓഫ് എൻജിനീയറിംഗ് വ്യവസായ–അക്കാദമിക സഹകരണം കൂടുതൽ ശക്തിപ്പെടുത്തുന്നതിനും വ്യവസായാധിഷ്ഠിത പഠനം, ഗവേഷണം, നൂതനാശയങ്ങൾ എന്നിവ പ്രോത്സാഹിപ്പിക്കുന്നതിനുമായി ഇൻഡസ്ട്രിയൽ ആർട്ടിഫിഷ്യൽ ഇന്റലിജൻസ്, ഇന്റർനെറ്റ് ഓഫ് തിംഗ്സ് മേഖലകളിൽ പ്രവർത്തിക്കുന്ന സാങ്കേതിക സ്ഥാപനമായ ഓംബ്രുള്ള പ്രൈവറ്റ് ലിമിറ്റഡുമായി ധാരണാപത്രം ഒപ്പുവെച്ചു.
മാർ അത്തനേഷ്യസ് കോളേജ് ഓഫ് എൻജിനീയറിംഗിനെ പ്രതിനിധീകരിച്ച് പ്രിൻസിപ്പൽ ഡോ. ബോസ് മാത്യു ജോസും, ഓംബ്രുള്ള പ്രൈവറ്റ് ലിമിറ്റഡിനെ പ്രതിനിധീകരിച്ച് ചീഫ് എക്സിക്യൂട്ടീവ് ഓഫീസർ നവീൻ ജോർജും ധാരണാപത്രത്തിൽ ഒപ്പുവെച്ചു.
പാഠ്യപദ്ധതി രൂപീകരണത്തിൽ സഹകരണം, വ്യാവസായിക പരിശീലന പരിപാടികൾ, വ്യവസായ സ്ഥാപനങ്ങളിലേക്കുള്ള സന്ദർശനങ്ങൾ, സംയുക്ത പദ്ധതികൾക്കുള്ള സാമ്പത്തിക പിന്തുണ എന്നീ ലക്ഷ്യത്തോടെയാണ് ധാരണാപത്രം ഒപ്പുവെച്ചത്.
ഇതിലൂടെ വിദ്യാർത്ഥികൾക്കും അധ്യാപകർക്കും അത്യാധുനിക വ്യാവസായിക സാങ്കേതികവിദ്യകളിൽ കൂടുതൽ പരിചയം നേടുന്നതിനും പ്രായോഗിക പഠനത്തിനും യഥാർത്ഥ വ്യാവസായിക പ്രശ്നങ്ങൾക്ക് പരിഹാരം കാണുന്ന സംയുക്ത പദ്ധതികൾ ഏറ്റെടുക്കുന്നതിനും അവസരം ലഭിക്കും.
ധാരണാപത്രം ഒപ്പുവെക്കുന്ന ചടങ്ങിൽ കോളേജിലെ ഇലക്ട്രോണിക്സ് ആന്റ് കമ്മ്യൂണിക്കേഷൻ എൻജിനീയറിംഗ് വിഭാഗം മേധാവി ഡോ. അജി ജോയ്, അധ്യാപകരായ ഡോ. സരിൻ എബ്രഹാം, ഡോ. തോമസ് മോഹൻ എന്നിവർ പങ്കെടുത്തു.
