പോത്താനിക്കാട്: പോത്താനിക്കാട് പോലീസ് സ്റ്റേഷന് പരിധിയില് സമീപകാലത്ത് നടന്ന മോഷണ പരമ്പരയിലെ രണ്ട് പ്രതികളെ പോലീസ് പിടികൂടി. കോതമംഗലം നങ്ങേലിപടി വട്ടേക്കോട്ട് പുത്തന്പുര അബ്ദുള് സമദ് (18), വാരപ്പെട്ടി മൈലൂര് കൊടക്കാപ്പിള്ളില് അതുല് അജി (18), എന്നിവരെയാണ് പോത്താനിക്കാട് എസ്എച്ച്ഒ സിജു ജോസഫിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. മോട്ടോര് പമ്പ് മോഷണം ഉള്പ്പെടെ പോത്താനിക്കാട് പോലീസ് രജിസ്റ്റര് ചെയ്ത നാലു കേസുകളിലെയും കല്ലൂര്ക്കാട് പോലീസ് രജിസ്റ്റര് ചെയ്ത ഒരു കേസിലെയും പ്രതികളാണിവര്.
ഊന്നുകല് പോലീസ് സ്റ്റേഷനില് രജിസ്റ്റര് ചെയ്ത കേസില് ജയില് ശിക്ഷ കഴിഞ്ഞ് പുറത്തിറങ്ങി വീണ്ടും ഇവര് മോഷണം നടത്തുകയായിരുന്നു. പോത്താനിക്കാട് പോലീസ് സ്റ്റേഷന് പരിധിയില് വീടുകള് കുത്തിതുറന്ന് സ്വര്ണവും പണവും കവര്ന്നതുള്പ്പെടെ അനേകം മോഷണങ്ങളാണ് അടുത്ത കാലങ്ങളില് നടന്നിട്ടുള്ളത്. പ്രതികളെ പിടികൂടാന് പോലീസിന് കഴിയാത്തത് ജനങ്ങളുടെ പ്രതിഷേധത്തിനിടയാക്കിയിരുന്നു. ഇതേ തുടര്ന്ന് മൂവാറ്റുപുഴ ഡിവൈഎസ്പി കെ.ആര് മനോജിന്റെ നിര്ദേശ പ്രകാരം എസ്എച്ച്ഒ സിജു ജോസഫിന്റെ നേതൃത്വത്തില് പ്രത്യേകസംഘം രൂപീകരിച്ചാണ് അന്വേഷണം നടത്തിയത്.
