കോതമംഗലം: സ്വര്‍ണ്ണക്കടത്ത് ക്വട്ടേഷന്‍ ഉള്‍പ്പെടെ നിരവധി ക്രിമിനല്‍ കേസുകളില്‍ പ്രതിയായ അര്‍ജുന്‍ ആയങ്കിയെ പോലീസ് കരുതല്‍ തടങ്കലിലെടുത്തു. പുന്നേക്കാടുള്ള റിസോര്‍ട്ടില്‍ സുഹൃത്തിന്റെ വിവാഹത്തില്‍ പങ്കെടുക്കാന്‍ എത്തിയപ്പോഴാണ് കോതമംഗലം പോലീസ് ഇയാളെയും സംഘത്തെയും കസ്റ്റഡിയിലെടുത്തത്.
ഞായറാഴ്ച പുലര്‍ച്ചെ 4ഓടെയാണ് അര്‍ജുന്‍ ആയങ്കിയും സുഹൃത്തുക്കളും പിടിയിലായത്. ഇവര്‍ സഞ്ചരിച്ചിരുന്ന മൂന്ന് കാറുകള്‍ പോലീസ് കസ്റ്റഡിയിലെടുത്തു. പുതിയ സ്വര്‍ണ്ണക്കടത്ത് അല്ലെങ്കില്‍ ഗുണ്ടാ ക്വാട്ടേഷനുകള്‍ ആസൂത്രണം ചെയ്യാനാണോ ഇവര്‍ ഒത്തുചേര്‍ന്നതെന്ന് പോലീസ് സംശയിക്കുന്നു. കോതമംഗലം സ്റ്റേഷന്‍ പരിധിയില്‍ ഇവര്‍ എത്തിയതിന്റെ ഉദ്ദേശത്തെക്കുറിച്ച് വിശദമായ അന്വേഷണം നടത്തുമെന്ന് പോലീസ് അറിയിച്ചു. അര്‍ജുന്‍ ആയങ്കി അടക്കമുള്ളവര്‍ക്കെതിരെ പുതിയ കേസുകള്‍ രജിസ്റ്റര്‍ ചെയ്യും.
