കോതമംഗലം : പല്ലാരിമംഗലം പഞ്ചായത്തിലെ മണിക്കിണർ പാലം അപ്പ്രോച്ച് റോഡ് നിർമ്മാണത്തിനായി ഏറ്റെടുക്കുന്ന ഭൂമിയ്ക്കും വീടുകൾ ക്കുമായുള്ള നഷ്ടപരിഹാരത്തുക അനുവദിച്ച് സർക്കാർ ഉത്തരവായതായി ആന്റണി ജോൺ എംഎൽഎ അറിയിച്ചു. ഏറ്റെടുക്കുന്ന ഭൂമിക്കും കെട്ടിടങ്ങൾക്കും നഷ്ടപരിഹാരം നൽകുന്നതിനായി 1,50,74,460/- രൂപയാണ് സർക്കാർ അനുവദിച്ച് ഉത്തരവായിട്ടുള്ളത്.
പല്ലാരിമംഗലം വില്ലേജിൽ ഉൾപ്പെടുന്ന 17.81 ആർ (44 സെൻ്റ്) ഭൂമിയാണ് 9 കേസുകളിലായി പാലത്തിനും അപ്രോച്ച് റോഡിനുമായി ഏറ്റെടുക്കുന്നത്. 3 വീടുകളും ഇതിൽ ഉൾപ്പെടുന്നു. ഏറ്റെടുക്കുന്ന ഭൂമിയുടെയും നിർമ്മിതികളുടെയും വിലയോടൊപ്പം വൃക്ഷങ്ങളുടെയും വിളകളുടെയും വില കൂടി ചേർത്താണ് നഷ്ടപരിഹാരം കണക്കാക്കുന്നത്. ഇതോടൊപ്പം 100 ശതമാനം സൊലേഷ്യവും ചേർത്താണ് നൽകുക. വീടുകൾ നഷ്ടപ്പെടുന്നവർക്ക് പ്രത്യേക നഷ്ടപരിഹാര പാക്കേജ് കൂടി നൽകും.
തുക അനുവദിച്ച് സർക്കാർ ഉത്തരവായതിനാൽ അവസാന ഘട്ട 19 (1) വിജ്ഞാപനം ഉടൻ പുറത്തിറങ്ങും. തുടർന്ന് വ്യക്തികൾക്ക് അവാർഡ് പാസ്സാക്കി നഷ്ടപരിഹാര തുക നൽകുമെന്നും, ഇതിന്റെ തുടർച്ചയിൽ ടെൻഡർ നടപടികൾ പൂർത്തീകരിച്ച് പാലത്തിന്റെ നിർമ്മാണം ആരംഭിക്കുമെന്നും എം.എൽ.എ പറഞ്ഞു .
