കോതമംഗലം :- ഇഞ്ചത്തൊട്ടിയിൽ സാമൂഹ്യ വിരുദ്ധരുടെ അഴിഞ്ഞാട്ടം; സ്ത്രീ സംരംഭക ലോൺ എടുത്തു വാങ്ങിയ അഞ്ചോളം കയാക്കിംഗുകൾ തകർത്തു. ചാരുപാറ സ്വദേശിനി സജിത സജീവ് ലോൺ എടുത്ത് വാങ്ങിയ നാല് കയാക്കിംഗ് വള്ളങ്ങളും ഒരു പെഡൽ ബോട്ടുമാണ് സാമൂഹ്യ വിരുദ്ധർ കുത്തിക്കീറി നശിപ്പിച്ചത്. ഇന്ന് രാവിലെ കയാക്കിംഗ് ബുക്ക് ചെയ്തിരുന്നവർ എത്തിയപ്പോഴാണ് കയാക്കിംഗുകളുടെ തകരാർ ഉടമകളുടെ ശ്രദ്ധയിൽപ്പെട്ടത്.
ഇഞ്ചത്തൊട്ടിയിലെത്തുന്ന വിനോദസഞ്ചാരികൾക്ക് പെരിയാറ്റിലൂടെ സഞ്ചരിക്കാൻ വാടകക്ക് നൽകിയിരുന്ന കയാക്കിംഗുകളാണ് നശിപ്പിക്കപ്പെട്ടത്. ലോൺ എടുത്തു വാങ്ങിയ ഈ കയാക്കിംഗുകളിൽ നിന്ന് കിട്ടുന്ന വാടകയായിരുന്നു ഇവരുടെ ഏക വരുമാനം. സീസൺ ആരംഭിച്ചപ്പോൾ തന്നെ ഉണ്ടായ ഈ സംഭവം ഇവർക്ക് ഇരട്ട പ്രഹരമായി. കോതമംഗലം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കയാക്കിംഗ് നശിപ്പിച്ച വരെ ഉടൻ കണ്ടു പിടിക്കണമെന്നും തനിക്ക് നീതി ലഭിക്കണമെന്നും ഉടമയായ സജിത സജീവ് പറഞ്ഞു.
