കോതമംഗലം:- മാതിരപ്പിളളി ഗവൺമെൻ്റ് വൊക്കേഷണൽ ഹയർ സെക്കന്ററി സ്കൂളിൽ 1കോടി 50 ലക്ഷം രൂപയുടെ നിർമ്മാണ പ്രവർത്തനങ്ങൾ പൂർത്തിയാകുന്നു.1912ൽ സ്ഥാപിതമായ സ്കൂളിൽ 1984 ൽ ആണ് വി എച്ച് എസ് സി ആരംഭിച്ചത്.കേരളത്തിൽ പുതിയ എൻ എസ് ക്യൂ ഇ കോഴ്സുകൾ ആരംഭിച്ച സ്കൂളുകളിൽ ഒന്നാണ് മാതിരപ്പിള്ളി സ്കൂൾ. ഇൻ്റീരിയർ ലാൻ്റ് സ്കേറ്റർ,മൈക്രോ ഇറിഗേഷൻ ടെക്നീഷ്യൻ,ഫ്ലോറികൾച്ചർ എന്നീ 3 കോഴ്സുകളിലായി 200 ഓളം കുട്ടികളാണ് ഇവിടെ പഠിക്കുന്നത്.പാഠ്യ പാഠ്യേതര രംഗങ്ങളിൽ ശ്രദ്ധേയമായ പ്രകടനം കാഴ്ചവയ്ക്കുന്ന സ്കൂളിന്റെ അടിസ്ഥാന സൗകര്യങ്ങൾ പരിമിതമായിരുന്നു. ഇതിനു പരിഹാരമായിട്ടാണ് 1 കോടി 50 ലക്ഷം രൂപയുടെ നിർമ്മാണ പ്രവർത്തനങ്ങൾക്ക് തുക അനുവദിച്ചിരുന്നതും അതിൻ്റെ നിർമ്മാണ പ്രവർത്തനങ്ങൾ പൂർത്തിയാകുന്നതും.
പഴയ കെട്ടിടത്തിൻ്റെ ഭാഗമായി ഷെഡ്ഡുകൾ പൊളിച്ചുമാറ്റി പുതിയ കെട്ടിടമാണ് പൂർത്തിയാട്ടുള്ളത്.ഇതിന്റെ ഭാഗമായി പുതിയതായി 6 ക്ലാസ്സ് മുറികളും,3 പുതിയ ലാബ് റൂമുകളും,3 ടോയ്ലറ്റും,പുതിയ സ്റ്റാഫ് റൂമും ഉൾപ്പെടെയുള്ള നിർമ്മാണ പ്രവർത്തനങ്ങളാണ് ഇപ്പോൾ പൂർത്തിയായിട്ടുള്ളത്. ആൻ്റണി ജോൺ എം എൽ എ യുടെ നേതൃത്വത്തിൽ ജനപ്രതിനിധികളും പി ഡബ്ല്യുഡി ഉദ്യോഗസ്ഥരും സ്കൂൾ അധികൃതരും നിർമ്മാണ പ്രവർത്തനങ്ങൾ വിലയിരുത്തി.
മുനിസിപ്പൽ വൈസ് ചെയർപേഴ്സൺ സിന്ധു ഗണേശൻ,വിദ്യാഭ്യാസ സ്റ്റാൻ്റിങ്ങ് കമ്മിറ്റി ചെയർമാൻ സിജോ വർഗീസ്,പ്രിൻസിപ്പാൾ രൂപ നായർ,പി റ്റി എ പ്രസിഡൻ്റ് റ്റി എസ് റെജി,പി ഡബ്ല്യൂ ഡി അസിസ്റ്റൻ്റ് എഞ്ചിനീയർ ആൻഡ്രു ഫെർണാൻസ് ടോം,എസ് എം സി വൈസ് ചെയർമാൻ മോഹനൻ പിള്ള,പി റ്റി എ അംഗം കെ പി എക്കൂബ്,എ പി പി നായർ എന്നിവർ എം എൽ എ യോടൊപ്പം ഉണ്ടായിരുന്നു.സ്കൂളിൻ്റെ ചരിത്രത്തിലെ ഏറ്റവും വലിയ വികസന പ്രവർത്തനങ്ങളാണ് ഇപ്പോൾ സാധ്യമായിട്ടുള്ളതെന്ന് എം എൽ എ പറഞ്ഞു.
