സ്കൂൾ കെട്ടിടത്തിന് മുകളിലേക്ക് വീണ മുത്തശ്ശിമാവ് ഡി വൈ എഫ് ഐ പ്രവർത്തകരും, നാട്ടുകാരും ചേർന്ന് മുറിച്ച് നീക്കി.

പല്ലാരിമംഗലം : രണ്ട് ദിവസം മുൻപുണ്ടായ ശക്തമായ കാറ്റിൽ പല്ലാരിമംഗലം ഗ്രാമ പഞ്ചായത്തിലെ പൈമറ്റം യു പി സ്കൂൾ കെട്ടിടത്തിന് മുകളിലേക്ക് കടപുഴകി വീണ മരം ക്രെയിനിന്റെ സഹായത്തോടെ ഡി വൈ എഫ് ഐ പ്രവർത്തകരും, നാട്ടുകാരും ചേർന്ന് മുറിച്ച് നീക്കി. 50 വർഷത്തിലേറെ പഴക്കമുള്ള മുത്തശ്ശി മാവാണ് കെട്ടിടത്തിന് മുകളിലേക്ക് വീണത്. കെട്ടിടത്തിന് സാരമായ കേടുപാടുകൾ സംഭവിച്ചിട്ടുണ്ട്.

സ്കൂൾ കെട്ടിടത്തിന്റെ കേടുപാട് സംഭവിച്ച ഭാഗം അടിയന്തിരമായി അറ്റകുറ്റപ്പണി നടത്തി ഉപയോഗയോഗ്യമാക്കുമെന്ന് സ്കൂൾ സന്ദർശിച്ച ഗ്രാമപഞ്ചായത്ത് പ്രസിഡന്റ് കദീജ മുഹമ്മദ്, വൈസ് പ്രസിഡന്റ് ഒ ഇ അബ്ബാസ്, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്ൺ സഫിയ സലിം എന്നിവർ പറഞ്ഞു.