വാഴക്കുളം: കാവനയിലെ വാടക വീട്ടില് നിന്ന് കഞ്ചാവ് പിടികൂടി. 49 ഗ്രാം ഉണങ്ങിയ കഞ്ചാവും 6010 രൂപയുമാണ് മൂവാറ്റുപുഴ എക്സൈസ് സംഘം ഇന്നലെ വൈകുന്നേരം പിടിച്ചെടുത്തത്. റേഞ്ച് ഇന്സ്പെക്ടര് കെ.എസ്.അനില് കുമാറിനു ലഭിച്ച രഹസ്യവിവരത്തെത്തുടര്ന്ന് കാവന തടത്തില് വീട്ടില് നടത്തിയ പരിശോധനയിലാണ് കഞ്ചാവ് കണ്ടെത്തിയത്.
ഇവിടെ വാടകയ്ക്ക് താമസിക്കുന്ന കാവന മലയില് സജീവന്റെ മകന് എം.എസ് അഭിരാജിന്റെ കിടപ്പുമുറിയില് നിന്നാണ് ഇവ കണ്ടെടുത്തത്. ഇയാളുടെ ഫോട്ടോ പതിച്ച തെരഞ്ഞെടുപ്പ് ഐഡി കാര്ഡും കണ്ടെടുത്തിട്ടുണ്ട്.നേരത്തേ മറ്റൊരു മയക്കുമരുന്ന് കേസില് ഉള്പ്പെട്ടിട്ടുള്ള അഭിരാജിനെതിരേ കേസ് രജിസ്റ്റര് ചെയ്തു. അസിസ്റ്റന്റ് എക്സൈസ് ഇന്സ്പെക്ടര് ഗ്രേഡ് പി.ജെ. ജയകുമാര്, പ്രിവന്റീവ് ഓഫിസര് കെ.കെ.രാജേഷ്, സിവില് എക്സൈസ് ഓഫിസര്മാരായ അമല് ടി. അലോഷ്യസ്, വിനീത് ശശി, കെ.കെ.അജിത്, വനിതാ സിവില് എക്സൈസ് ഓഫിസര് അനുമോള് ദിവാകരന് എന്നിവരുടെ നേതൃത്വത്തിലാണ് പരിശോധന നടത്തിയത്.
