കോതമംഗലം : നിയമസഭ തെരഞ്ഞെടുപ്പില് കോതമംഗലത്തു നിന്നും ജനവിധി തേടണമെന്ന് എന്റെ നാട് ജനകീയ കൂട്ടായ്മ അധ്യക്ഷന് ഷിബു തെക്കുംപുറത്തിനുമേല് സമ്മര്ദ്ദം ശക്തമാകുന്നു. എന്റെ നാടിന്റെ വിവിധ യൂണിറ്റുകള് ഈ ആവശ്യം മുന്നോട്ടു വച്ചു കഴിഞ്ഞു. കേരള കോണ്ഗ്രസ് എറണാകുളം ജില്ലാ പ്രസിഡന്റായ ഷിബു തെക്കുംപുറം നേതൃത്വം നല്കുന്ന എന്റെ നാട് കോതമംഗലത്തെ ഏറ്റവും വലിയ ജനകീയ കൂട്ടായ്മയാണ്. ആയിരക്കണക്കിനാളുകള്ക്ക് വിവിധ തലങ്ങളിൽ സഹായമെത്തിക്കുന്ന ഷിബു തെക്കുംപുറത്തിന് രാഷ്ട്രീയത്തിനപ്പുറമുള്ള പിന്തുണയാണ് കോതമംഗലത്തുള്ളത്.
കിഴക്കമ്പലം 20- 20 മാതൃകയില് ഷിബു തെക്കുംപുറം നിയമസഭയിലേക്ക് മത്സരിക്കണമെന്നാണ് വിവിധ കോണുകളിൽ നിന്നുള്ള ആവശ്യം. എന്നാല് യുഡിഎഫില് കേരള കോണ്ഗ്രസിന്റെ സീറ്റായ കോതമംഗലത്ത് ഷിബു തെക്കുംപുറം സ്ഥാനാര്ത്ഥിയാകാനാണ് സാധ്യതയെന്ന് രാഷ്ട്രീയ നിരീക്ഷകർ വെളിപ്പെടുത്തുന്നു. മുന്നണിയുടെ സ്ഥാനാര്ത്ഥിയല്ലെങ്കിലും എന്റെ നാടിന്റെ പ്രതിനിധിയായി മത്സര രംഗത്തുണ്ടാകണമെന്നാണ് വിവിധ യൂണിറ്റുകളുടെ ആവശ്യം. എന്നാൽ ഇതിനെ കുറിച്ച് ഷിബു തെക്കുംപുറം പ്രതികരിച്ചിട്ടില്ല.
