കോതമംഗലം: ഉന്നതവിദ്യാഭ്യാസം നാലുവര്ഷ ബിരുദത്തിലേക്ക് കടന്നതോടെ കോതമംഗലം മാര് അത്തനേഷ്യസ് കോളേജില് പുതു തലമുറ കോഴ്സുകള് മൂന്നെണ്ണം കൂടി ആരംഭിച്ചു. പ്ലസ് ടുവിനു ശേഷം വ്യത്യസ്തവും, തൊഴില് സാധ്യത ഉറപ്പു നല്കുന്നതുമായ ട്രെന്ഡിംഗ് കോഴ്സുകളായ ആക്ച്ചുറിയല് സയന്സ്, കമ്പ്യൂട്ടര് സയന്സ് -ആര്ട്ടിഫിഷ്യല് ഇന്റലിജന്സ് എന്നി ബിരുദ എയ്ഡഡ് പ്രോഗ്രാമുകളും, ബിരുദാനന്തര തലത്തില് പഠിക്കുവാന് സെല്ഫ് ഫിനാന്സിങ് വിഭാഗത്തില് എംഎസ്സി ഗ്രീന് ഹൈഡ്രജന് എനര്ജി പ്രോഗ്രാമുമാണ് കോളേജ് പുതിയതായി ആരംഭിച്ചിരിക്കുന്നത്.
തൊഴിലിനും നൈപുണിക്കും പ്രാധാന്യം നല്കി വിഭാവനം ചെയ്തതാണ് ഈ കോഴ്സുകള്.കേരളത്തില് ആദ്യമായി ബിഎസ്സി ആക്ച്ചുറിയല് സയന്സ് കോഴ്സും, ഇന്ത്യയില് ആദ്യമായി എംഎസ്സി ഗ്രീന് ഹൈഡ്രജന് എനര്ജി കോഴ്സും ആരംഭിക്കുന്നത് മാര് അത്തനേഷ്യസ് കോളേജാണെന്നുള്ള പ്രത്യേകത കൂടിയുണ്ടെന്ന് പ്രിന്സിപ്പല് ഡോ. മഞ്ജു കുര്യന് പറഞ്ഞു.
പുതിയ സാങ്കേതിക വിദ്യ, തൊഴില് പ്രവണത എന്നിവയ്ക്കിണങ്ങിയ സാമ്പത്തിക ഉപദേശക സംവിധാനം ആക്ച്ചുറിക്കുണ്ട്. ആഗോള സമ്പദ് വ്യവസ്ഥകളില് കോര്പറേറ്റുകള്ക്കും സ്വകാര്യ സ്ഥാപനങ്ങള്ക്കും ഒഴിവാക്കാനാവാത്ത തസ്തികയാണിത്. ഇന്ത്യയില് ഈ കോഴ്സ് നടത്തുന്ന വിദ്യാഭ്യാസ സ്ഥാപനങ്ങളുടെ എണ്ണം കുറവാണ്. ആധുനിക കമ്പ്യൂട്ടര് സയന്സിന്റെ ഏറ്റവും പ്രധാനപ്പെട്ട ഒരു ശാഖയാണ് ആര്ട്ടിഫിഷ്യല് ഇന്റലിജന്സ്. മനുഷ്യനെപ്പോലെ ചിന്തിക്കാനും, കാര്യങ്ങള് ഗ്രഹിക്കാനും, തീരുമാനങ്ങള് എടുക്കാനും, പ്രശ്നങ്ങള് പരിഹരിക്കാനും കമ്പ്യൂട്ടറുകളെയും യന്ത്രങ്ങളെയും പ്രാപ്തമാക്കുന്ന സാങ്കേതികവിദ്യയാണിത്.
കമ്പ്യൂട്ടര് സയന്സിന്റെ ഒരു ഉപവിഭാഗമാണ് ആര്ട്ടിഫിഷ്യല് ഇന്റലിജന്സ്. പരമ്പരാഗത കമ്പ്യൂട്ടര് പ്രോഗ്രാമുകള് കമ്പ്യൂട്ടറിന് എന്തുചെയ്യണമെന്നതിനുള്ള കൃത്യമായ നിര്ദ്ദേശങ്ങള് നല്കുന്നു. എന്നാല് എ ഐ യില് മെഷീനുകള് വലിയ അളവിലുള്ള ഡാറ്റയില് നിന്നും പാറ്റേണുകളില് നിന്നും സ്വയം പഠിക്കുകയും അനുഭവത്തില് നിന്ന് മെച്ചപ്പെടുകയും ചെയ്യുന്നു.ഇതിന്റെ പ്രധാന ഉപവിഭാഗങ്ങള് മെഷീന് ലേണിംഗ്, ഡീപ് ലേണിംഗ്,നാച്ചുറല് ലാംഗ്വേജ് പ്രോസസ്സിംഗ് എന്നിവയാണ്. കമ്പ്യൂട്ടര് സയന്സ് ബിരുദ കോഴ്സുകള് പഠിച്ചു കഴിഞ്ഞാല് സോഫ്റ്റ്വെയര് ഡെവലപ്മെന്റ്, ഡാറ്റാ സയന്സ്, റോബോട്ടിക്സ്, മെഷീന് ലേണിംഗ് എഞ്ചിനീയറിംഗ് തുടങ്ങിയ മേഖലകളില് മികച്ച തൊഴിലവസരങ്ങളാണ് സൃഷ്ടിക്കുന്നത്. ഈ മൂന്ന് കോഴ്സുകളിലേക്കുമുള്ള അഡ്മിഷന് നടപടികള് പുരോഗമിക്കുന്നു. കൂടുതല് വിവരങ്ങള്ക്ക് ബന്ധപ്പെടുക: 9383431512, 0485-2822378
