കോതമംഗലം: മഴക്കൊപ്പമുണ്ടായ ഇടിമിന്നലേറ്റ് കുട്ടമ്പുഴ പഞ്ചായത്തിലെ മാമലകണ്ടത്ത് മൂന്ന് വീടുകള്ക്ക് ഭാഗികനാശം. ഇടിമിന്നലേറ്റ് രണ്ട് സ്ത്രീകള്ക്ക് പരിക്കേറ്റു. ഗുരുതരമല്ല. മാമലകണ്ടം മാവിന്ചുവട് ഭാഗത്ത് താമസിക്കുന്ന മേട്നാപ്പാറ ഉന്നതിയിലെ ചന്ദ്രിക എല്ദോസ്, കളരിക്കില് വിജുവിന്റെ ഭാര്യ ജിഷ എന്നിവര്ക്കാണ് മിന്നലേറ്റത്. ഇന്ന് വൈകിട്ട് 5.30നാണ് സംഭവം.
കട്ടിലില് ഇരിക്കുകയായിരുന്ന ജിഷയുടെ പുറത്ത് മിന്നലേറ്റ് തരിപ്പ് അനുഭവപ്പെടുകയും, മോഹാലസ്യപ്പെട്ട് വീഴുകയുമായിരുന്നു. പുറത്ത് അസഹ്യമായ വേദനയും ഉണ്ടായി. ചന്ദ്രികയുടെ കൈയ്യിന് മുക്കാല് മണിക്കൂറോളം മരവിപ്പ് സംഭവിച്ചു. ചന്ദ്രികയുടെ വീട്ടിലും ഭര്ത്തൃസഹോദരന് കളരിക്കല് വിജു, ചുണ്ടാട്ട് എല്ദോസ് എന്നിവരുടെ വീടുകള്ക്കുമാണ് മിന്നലേറ്റത്.
ഇവരുടെ വീടുകളിലെ വയറിങും മുഴുവന് കത്തിനശിച്ചു. ചന്ദ്രികയുടെ വീട്ടിലാണ് കൂടുതല് നാശനഷ്ടം ഉണ്ടായത്. വൈദ്യുതി മീറ്ററും ഇലക്ട്രിക്ക്, ഇലക്ട്രോണിക്സ് ഉപകരണങ്ങളും പൊട്ടിത്തെറിച്ച് ചിന്നിചിതറി. ഫ്രിഡ്ജ്, മിക്സി, വാഷിംഗ് മെഷീന്, മോട്ടോര് പമ്പ് സെറ്റ്, ടി.വി, സ്വിച്ച് ബോര്ഡുകള് തുടങ്ങിയവയെല്ലാം ഉപയോഗശൂന്യമായതായി എല്ദോസ് പറഞ്ഞു. വീടിന്റെ പിന്ഭാഗത്തും ബെഡ് റൂമിന്റേയും ഭിത്തികള്ക്ക് വിള്ളല് ഉണ്ടായിട്ടുണ്ട്. ഉദ്ദേശം ഒരു ലക്ഷം രൂപയുടെ നാശനഷ്ടം നേരിട്ടതായി എല്ദോസ് പറഞ്ഞു.
