മൂവാറ്റുപുഴ: പേഴയ്ക്കപ്പിള്ളിയില്‍ നിന്ന് കഞ്ചാവും, ഹെറോയിനുമായി മൂന്ന് ഇതര സംസ്ഥാനക്കാര്‍ എക്‌സൈസ് പിടിയില്‍. പായിപ്ര കവലയില്‍ നിന്ന് ഒന്നര കിലോ കഞ്ചാവുമായി ബീഹാര്‍ സ്വദേശി ബിധാന്‍ ദാസ് (27), മറ്റൊരു കേസില്‍ പായിപ്രകവലയില്‍ നിന്ന് തന്നെ 1.3 ഗ്രാം ഹെറോയിനുമായി ആസാം സ്വദേശികളായ ഖജലുദ്ദീന്‍ (30), ഇജാദുല്‍ ഹഖ് (25) എന്നിവരുമാണ് അറസ്റ്റിലായത്. മൂവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജി. കൃഷ്ണകുമാറിന്റെ നേതൃത്വത്തില്‍ വെള്ളിയാഴ്ച രാവിലെ 11ഓടെ നടത്തിയ പരിശോധനയിലാണ് പ്രതികള്‍ പിടിയിലായത്.
പിടിയിലായവരില്‍ ബിദാന്‍ ദാസ് ബോംബെയില്‍ രണ്ട് കിലോ കഞ്ചാവ് പിടികൂടിയ കേസില്‍ ജാമ്യത്തിലിറങ്ങി പായിപ്ര ജംഗ്ഷനില്‍ ഇയാളുടെ സഹോദരനൊപ്പം താമസിച്ച്് കഞ്ചാവ് വില്‍പ്പന നടത്തിവരികയായിരുന്നു. എക്‌സൈസ് സംഘം പിടികൂടാന്‍ ശ്രമിക്കുന്നതിനിടയില്‍ ബിധാന്‍ ദാസ് ഓടി രക്ഷപ്പെടുകയും, രക്ഷപ്പെടാന്‍ ശ്രമിക്കുന്നതിനിടയില്‍ ബിധാന്‍ ദാസ് കിണറ്റില്‍ വീഴുകയും ചെയ്തു. തുടര്‍ന്ന് മൂവാറ്റുപുഴ ഫയര്‍ഫോഴ്‌സിന്റെ സഹായത്തോടെയാണ് പ്രതിയെ കിണറ്റില്‍ നിന്നും പിടികൂടി അറസ്റ്റ് ചെയ്തതെന്ന് മൂവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജി കൃഷ്ണകുമാര്‍ പറഞ്ഞു.
ഹെറോയിനുമായി അറസ്റ്റിലായ ഇജാദുല്‍ ഹക്കിനെ മുന്‍പ് കഞ്ചാവ് വില്‍പന നടത്തിയതിന് മൂവാറ്റുപുഴ എക്‌സൈസ് സംഘം തന്നെ അറസ്റ്റ് ചെയ്തിരുന്നു. അറസ്റ്റിലായ പ്രതികളെ നാളെ കോടതിയില്‍ ഹാജരാക്കും. പ്രിവെന്റ്റീവ് ഓഫീസര്‍ മനോജ്, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ അജയകുമാര്‍, ഗ്രേഡ് പ്രിവെന്റ്റീവ് ഓഫീസര്‍മാരായ മാഹിന്‍, ഷബീര്‍, ഉമ്മര്‍, വികാന്ത്, വനിതാ സിവില്‍ എക്‌സൈസ് ഓഫീസര്‍ അനിത എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്
