കോതമംഗലം: നിയമസഭാ തിരഞ്ഞെടുപ്പിൽ ജനങ്ങൾ നൽകിയ വൻ പിന്തുണയ്ക്കും വിശ്വാസത്തിനും നേരിട്ട് നന്ദി അറിയിച്ച് ഷിബു തെക്കുംപുറം നടത്തുന്ന മണ്ഡല പര്യടനം ശ്രദ്ധേയമായി മുന്നേറുന്നു. ഇന്നലെ നെല്ലിക്കുഴി പഞ്ചായത്തിൽ നടന്ന പര്യടനം 314 കവലയിൽ നിന്ന് ആരംഭിച്ച് നെല്ലിക്കുഴിയിൽ സമാപിച്ചു. വിവിധ കേന്ദ്രങ്ങളിൽ നാട്ടുകാരും പ്രവർത്തകരും ആവേശകരമായ സ്വീകരണമാണ് നൽകിയത്.
ജനങ്ങളെ നേരിൽ കണ്ടു നന്ദി പറയുകയും അവരുടെ പ്രശ്നങ്ങളും ആവശ്യങ്ങളും കേൾക്കുകയും ചെയ്യുകയാണ് പര്യടനത്തിന്റെ പ്രധാന ലക്ഷ്യമെന്ന് ഷിബു തെക്കുംപുറം പറഞ്ഞു.കോതമംഗലത്തിന്റെ വികസനത്തിനായി ജനങ്ങളോടൊപ്പം ചേർന്ന് പ്രവർത്തിക്കുമെന്നും അദ്ദേഹം വ്യക്തമാക്കി. തങ്കളം-കാക്കനാട് നാലുവരിപാത, കുടിവെള്ള പദ്ധതികളുടെ മെച്ചപ്പെടുത്തൽ, ആരോഗ്യ-വിദ്യാഭ്യാസ മേഖലകളുടെ പുരോഗതി, യുവാക്കൾക്ക് കൂടുതൽ തൊഴിൽ അവസരങ്ങൾ സൃഷ്ടിക്കൽ, കാർഷിക മേഖലയെ ശക്തിപ്പെടുത്തൽ തുടങ്ങിയ വിഷയങ്ങൾക്ക് മുൻഗണന നൽകുമെന്ന് അദ്ദേഹം പറഞ്ഞു.
“ജനങ്ങൾ നൽകിയ വിശ്വാസം വലിയ ഉത്തരവാദിത്വമാണ്. ഓരോ പ്രദേശത്തെയും ആവശ്യങ്ങൾ മനസ്സിലാക്കി എല്ലാവരെയും ഉൾക്കൊള്ളുന്ന വികസന പ്രവർത്തനങ്ങളുമായി മുന്നോട്ട് പോകും,” എന്നും അദ്ദേഹം കൂട്ടിച്ചേർത്തു.
കവളങ്ങാട് ബ്ലോക്ക് പ്രസിഡന്റ് ബാബു ഏലിയാസ് ഉദ്ഘാടനം നിർവഹിച്ചു. യുഡിഎഫ് നേതാക്കളായ എ റ്റി പൗലോസ്, എം വി റെജി, കെ എം ഹാരിസ്, പഞ്ചായത്ത്‌ പ്രസിഡന്റ് സനീറ നസ്സീർ, സി കെ സത്യൻ, എൻ സി ചെറിയാൻ, നാസ്സർ വട്ടേക്കടാൻ, റ്റി ജി അനിമോൻ, കെ എം പരീത്, സി എം യൂസഫ്, പരീത് പട്ടമാവുടിയിൽ, വിനോദ് കെ മേനോൻ, രഹ്ന നൂറുദ്ധീൻ, ഷമീർ പാറപ്പാട്ട്, വാർഡ് മെമ്പർമാർ തുടങ്ങീ നിരവധി യുഡിഎഫ് പ്രവർത്തകരും പങ്കെടുത്തു.തിങ്കളാഴ്ച കോതമംഗലം ഈസ്റ്റ് മണ്ഡലം, പിണ്ടിമന, വടാട്ടുപാറ തുടങ്ങിയ മേഖലകളിൽ പര്യടനം നടത്തും.
