കോതമംഗലം: നേര്യമംഗലംപമ്പ സംസ്ഥാന പാതയുടെ ഭാഗമായ ഊന്നുകല്വെങ്ങല്ലൂര് റോഡ് വീതി കൂട്ടി ആധുനിക നിലവാരത്തില് പുനര്നിര്മിക്കണമെന്ന് ആവശ്യം. റോഡിന്റെ വീതിക്കുറവും അപകടകരമായ വളവുകളും വാഹന യാത്രക്കാര്ക്ക് വലിയ ബുദ്ധിമുട്ടാണ് സൃഷ്ടിക്കുന്നത്. നിര്മാണത്തിലെ അപാകതകള് മൂലം അപകടങ്ങള് നിത്യസംഭവമാണെന്നും അതിനാല് റോഡ് അടിയന്തിരമായി വീതികൂട്ടി പുനര് നിര്മിക്കണമെന്നും കോതമംഗലം ജനകീയ കൂട്ടായ്മ ആവശ്യപ്പെട്ടു. ദേവികുളം, ഉടുമ്പന്ചോല താലൂക്കുകളിലെ വിവിധ പ്രദേശങ്ങളില് നിന്നുള്ള ജനങ്ങള്ക്ക് തൊടുപുഴ, പാലാ തുടങ്ങിയ പ്രധാന കേന്ദ്രങ്ങളിലേക്ക് എത്തിച്ചേരുന്നതിനുള്ള പാതകളിലൊന്നാണ് ഇത്. ദിനംപ്രതി ആയിരക്കണക്കിന് വാഹനങ്ങള് മൂന്നാര് പോലുള്ള ഏറ്റവും പ്രധാനപെട്ട ടൂറിസ്റ്റ് കേന്ദ്രങ്ങളിലേക്കും അയല് സംസ്ഥാനങ്ങളിലേക്കും യാത്ര ചെയ്യുന്നതിന് ഉപയോഗിക്കുന്ന റോഡാണിത്.
ദേവികുളം, ഉടുമ്പന്ചോല മേഖലകളെ തൊടുപുഴ, പാലാ തുടങ്ങിയ പ്രധാന കേന്ദ്രങ്ങളുമായി കൂടുതല് കാര്യക്ഷമമായി ബന്ധിപ്പിക്കുന്നതിനും ഈ പ്രദേശങ്ങളുടെ സാമ്പത്തികവും സാമൂഹികവുമായ വികസനത്തിനും റോഡിന്റെ നവീകരണം അനിവാര്യമാണ്. നാളുകളായി കാലാനുസൃതമായ നവീകരണം നടത്താത്ത ഊന്നുകല്വെങ്ങല്ലൂര് റോഡിന്റെ സമഗ്ര നവീകരണത്തിന് അടിയന്തര നടപടി വേണമെന്ന് കോതമംഗലം ജനകീയ കൂട്ടായ്മ ഭാരവാഹികളായ രാജേഷ് രാജന്, ജോര്ജ് എടപ്പാറ, എബിന് അയ്യപ്പന്, ബോബി ഉമ്മന് എന്നിവര് ആവശ്യപ്പെട്ടു.
