പെരുമ്പാവൂർ : മുഖ്യമന്ത്രിയുടെ ഓഫിസ് കൊള്ളയുടെയും അഴിമതിയുടെയും സ്വജന പക്ഷപാതത്തിന്റെയും കേന്ദ്രമായി മാറിയതായി എൽദോസ് കുന്നപ്പിള്ളി എംഎൽഎ ആരോപിച്ചു. ചരിത്രത്തിൽ ഇന്ന് വരെ കണ്ടിട്ടില്ലാത്ത രീതിയിൽ മുഖ്യമന്ത്രിയുടെ ഓഫിസ് സ്വർണ്ണകടത്തിന് കൂട്ടു നിൽക്കുന്നത് മുഖ്യമന്ത്രി അത്രയും അധപതിച്ചു പോയതുകൊണ്ടാണെന്നും എംഎൽഎ പറഞ്ഞു. സ്വർണ്ണ കടത്ത് കേസും സർക്കാരിന്റെ അഴിമതിയും സിബിഐ അന്വേഷിക്കുക, മുഖ്യമന്ത്രി പിണറായി വിജയൻ രാജിവെക്കുക എന്നി ആവശ്യങ്ങൾ ഉന്നയിച്ചു യുഡിഎഫ് എംഎൽഎ മാരും എംപിമാരും അതാത് മണ്ഡലങ്ങളിൽ സംഘടിപ്പിച്ച സ്പീക്ക് അപ്പ് കേരള സത്യാഗ്രഹത്തിൽ സംസാരിക്കുകയായിരുന്നു അദ്ദേഹം. പിണറായി വിജയൻ മുഖ്യമന്ത്രി സ്ഥാനം രാജിവെച്ചു ജനങ്ങളോട് മാപ്പ് പറയണമെന്നും കേന്ദ്ര സർക്കാർ നിശ്ചലമാകാതെ സിബിഐ അന്വേഷണം നടത്തുവാൻ തയ്യാറാകണമെന്നും എംഎൽഎ ആവശ്യപ്പെട്ടു.
എഐസിസി ജനറൽ സെക്രട്ടറി മുകൾ വാസ്നിക്ക് ഓൺലൈനിലൂടെ സ്പീക് അപ്പ് കേരള ഉദ്ഘാടനം നിർവഹിച്ചു. പെരുമ്പാവൂർ എംഎൽഎ ഓഫിസിൽ യുഡിഫ് നിയോജകമണ്ഡലം കൺവീനർ തോമസ് പി കുരുവിള, മുസ്ലിം ലീഗ് നിയോജകമണ്ഡലം ജനറൽ സെക്രട്ടറി സുബൈർ ഓണമ്പിള്ളി, കേരള കോണ്ഗ്രസ് ജോസഫ് നേതാവ് ജോർജ്ജ് കിഴക്കുമശ്ശേരി, ആർഎസ്പി ജില്ല കമ്മിറ്റിയംഗം വി.ബി മോഹനൻ എന്നിവരാണ് സത്യാഗ്രഹം അനുഷ്ഠിച്ചത്. കെപിസിസി നിർവാഹക സമിതി അംഗം ഒ. ദേവസി, കെപിസിസി അംഗം കെ.എം.എ സലാം, ഡിസിസി വൈസ് പ്രസിഡന്റ്‌ മനോജ്‌ മൂത്തേടൻ, ബ്ലോക്ക് പ്രസിഡന്റുമാരായ ബാബു ജോൺ, കെ.പി വർഗീസ്, മുസ്ലിം ലീഗ് നിയോജകമണ്ഡലം പ്രസിഡന്റ്‌ എസ് ഷറഫ്, എൻ.എ റഹീം, പി.പി അവറാച്ചൻ, ദളിത് കോൺഗ്രസ്‌ സംസ്ഥാന ജനറൽ സെക്രട്ടറി എ.സി ചന്ദ്രൻ, മണ്ഡലം പ്രസിഡന്റ്‌ എസ്.എ മുഹമ്മദ്‌, പി.എസ് രാജൻ എന്നിവർ പങ്കെടുത്തു.
