പെരുമ്പാവൂർ : പെരുമ്പാവൂർ മണ്ഡലത്തിലെ വല്ലത്തെയും ആലുവ നിയോജകമണ്ഡലത്തിലെ പാറപ്പുറത്തേയും ബന്ധിപ്പിച്ചു നിർമിക്കുന്ന വല്ല കടവ് പാറപ്പുറം പാലത്തിന്റെ ചേലാമറ്റം വില്ലേജ് പരിധിയിൽ മണ്ണിടിഞ്ഞ ഭാഗത്ത് എൽദോസ് കുന്നപ്പിള്ളി എം എൽ എ യും, പെരുമ്പാവൂർ നഗരസഭ ചെയർമാൻ സക്കീർ ഹുസൈൻ എന്നിവരുടെ നേതൃത്വത്തിൽ സന്ദർശനം നടത്തി .
2016 ൽ ഭരണാനുമതിയും സാങ്കേതികാനുമതിയും ലഭിച്ചു. 22.22 കോടി രൂപയുടേതാണു പദ്ധതി. ഇതിൽ 12.89 കോടി രൂപയുടെ പ്രവൃത്തികൾ പൂർത്തിയായപ്പോഴാണു നിർമാണം നിലച്ചത്.
9.33 കോടി രൂപയുടേതാണു പുതിയ ടെൻഡർ പ്രകാരമുള്ള നിർമ്മാണം ആണ് ഇനി പൂർത്തി ആക്കാൻ ബാക്കിയുള്ളത്. 288 മീറ്ററാണു നീളം. 14 മീറ്ററാണു വീതി. ഇതിൽ 3.25 മീറ്റർ വീതിയിൽ ഇരുവശത്തും നടപ്പാതയുണ്ടാകും. പാലം പൂർത്തിയായാൽ കൊച്ചി രാജ്യാന്തര വിമാനത്താവളം, തിരുവൈരാണിക്കുളം ക്ഷേത്രം, കാഞ്ഞൂർ ഫൊറോന പള്ളി എന്നിവിടങ്ങളിലേക്കു ഗതാഗതക്കുരുക്കിൽപെടാതെ എത്താനാകും. കിഴക്കൻ ജില്ലകളിൽ നിന്നെത്തുന്നവർക്ക് 8 കിലോമീറ്റർ ലാഭിക്കാം. പാറപ്പുറം, വെള്ളാരപ്പിള്ളി, കാഞ്ഞൂർ, തുറവുംകര, പുതിയേടം പ്രദേശങ്ങളിലുള്ളവർക്കു പെരുമ്പാവൂർ പട്ടണത്തിലേക്ക് എളുപ്പം എത്താനാകും.
പാലം നിർമാണം നടക്കുന്ന പദ്ധതിപ്രദേശത്ത് നിലനിൽക്കുന്ന തർക്കങ്ങൾ പരിഹരിച്ച് നിർമ്മാണം കാലവർഷം ആരംഭിക്കുന്നതിനു മുൻപായി ബന്ധപ്പെട്ട ഉദ്യോഗസ്ഥർക്കും, കരാറുകാർക്കും നേരത്തെ തന്നെ എംഎൽഎ നിർദ്ദേശം കൊടുത്തിട്ടുള്ളതാണ്. നിലവിലെ അടിയന്തര സാഹചര്യം കണക്കിലെടുത്ത് മണ്ണിടിച്ചിൽ ഭീഷണി നിലനിൽക്കുന്ന സ്ഥലത്തെ വ്യക്തികളുടെ ജീവനും സ്വത്തിനും സംരക്ഷണം നൽകുന്നതിനായി ജില്ല ദുരന്ത നിവാരണ വകുപ്പ് അധികാരികൾക്കും, ജില്ലാ കളക്ടർക്കും കത്ത് മുഖേന സ്ഥിതി വിവരങ്ങൾ എം എൽ എ അറിയിച്ചിട്ടുള്ളതാണ്. നിലവിൽ സംരക്ഷണ ഭിത്തിയുടെ നിർമ്മാണം ആരംഭിച്ചിട്ടുണ്ടെന്നും എൽദോസ് കുന്നപ്പിള്ളി എംഎൽഎ അറിയിച്ചു.
