കോതമംഗലം : മുവാറ്റുപുഴ പേഴക്കാപ്പിള്ളിയിൽ വച്ചുണ്ടായ വാഹനാപകടത്തില്‍ പരിക്കേറ്റ് ചികിത്സയിലായിരുന്ന കോട്ടപ്പടി ഉപ്പുകണ്ടം സ്വദേശിയായ യുവാവ് മരിച്ചു. ഉപ്പുകണ്ടം മനക്കശ്ശേരിൽ സോമൻ പ്രീത ദമ്പതികളുടെ മൂത്തമകൻ അഖിൽ സോമൻ (33) ആണ് ചൊവ്വാഴ്ച്ച രാത്രി നടന്ന അപകടത്തിൽ മരിച്ചത്. അഖിൽ സഞ്ചരിച്ച ഇരുചക്ര വാഹനം പിക്കപ്പ് വാനുമായി കൂട്ടിയിടിച്ചു പരിക്ക് പറ്റിയ അഖിലിനെ കോലഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. തുടർന്ന് വിദഗ്ധ ചികിത്സക്കായി എറണാകുളം മെഡിക്കൽ ട്രസ്റ്റിൽ പ്രവേശിപ്പിക്കുകയും ആരോഗ്യസ്ഥിതി മോശമായതിനെത്തുടർന്ന് ഇന്ന് രാവിലെ പതിനൊന്ന് മണിയോടുകൂടി ജീവൻ നഷ്ടപ്പെടുകയായിരുന്നു. സഹോദരൻ അഭിജിത്ത്. സംസ്കാരം നാളെ വെള്ളിയാഴ്ച്ച വീട്ടുവളപ്പിൽ.

കോതമംഗലം : എറണാകുളം കുണ്ടന്നൂരിൽ ബൈക്കും കാറും കൂട്ടിയിടിച്ചുണ്ടായ അപകടത്തിൽ കോതമംഗലം സ്വദേശികളായ രണ്ട്‌ യുവാക്കൾ മരിച്ചു. തങ്കളം കരിമല പുത്തൻപുരയ്ക്കൽ ഹംസയുടെ മകൻ അജ്മൽ (18), തൃക്കാരിയൂർ കുന്നത്തുപറമ്പിൽ വീട്ടിൽ അഭിജിത്ത് (17) എന്നിവരാണ് മരിച്ചത്. ഇരുവരും സഞ്ചരിച്ചിരുന്ന ബൈക്ക് എതിരെ വന്ന കാറിൽ ഇടിക്കുകയായിരുന്നു.

ഇന്നലെ(തിങ്കൾ) രാത്രിയാണ് അപകടം നടന്നത്. അജ്മൽ സംഭവസ്ഥലത്ത് വച്ച് തന്നെ മരിച്ചു. ഗുരുതര പരിക്കേറ്റ അഭിജിത്ത് എറണാകുളത്തെ സ്വകാര്യ ആശുപത്രിയിൽ വച്ച് ഇന്ന്(ചൊവ്വ) ഉച്ചയോടെ മരണത്തിന് കീഴടങ്ങി. അജ്മലും അഭിജിത്തും അടുത്ത സുഹൃത്തുക്കളായിരുന്നു. അജ്മലിന്റെ സഹോദരിയുടെ വിവാഹം ഞായറാഴ്ചയായിരുന്നു. തങ്കളത്തെ വീട്ടിലായിരുന്ന സഹോദരിയുടെ മൊബൈൽ ഫോൺ നൽകുന്നതിനായാണ് അജ്മൽ സുഹൃത്തായ അഭിജിത്തിനെയും കൂട്ടി സഹോദരിയുടെ ഭർതൃവീട്ടിലേക്ക് പോയത്. തിരികെ വരുമ്പോഴാണ് അപകടമുണ്ടായത്.

കോതമംഗലം : കോട്ടപ്പടി മാർ എലിയാസ് ഹയർ സെക്കൻഡറി സ്കൂൾ വിദ്യർത്ഥിയുടെ കാലിലൂടെ സ്വകാര്യ ബസ് കയറിയിറങ്ങി. ഇന്ന് വൈകിട്ട് സ്കൂൾ സമയം അവസാനിച്ചപ്പോൾ ആണ് അപകടം നടന്നത്. ആയക്കാട് സ്വദേശിയായ ഏഴാം ക്ലാസ്സ് വിദ്യാർത്ഥിയായ ഹസനുൽ ബന്ന സഹപാഠികൾക്കൊപ്പം ബസ് കയറുവാൻ വരുമ്പോൾ ആണ് ദാരുണമായ അപകടം സംഭവിച്ചത്. കോട്ടപ്പടി വഴി കോതമംഗലത്തേക്ക് സർവീസ് നടത്തുന്ന കൊച്ചിൻ ബസിന്റെ പിൻ ചക്രം ഹസനുൽ ബന്നയുടെ കാലിലൂടെ കയറിയിറങ്ങുകയായിരുന്നു.

അപകടം നടന്നയുടനെ വിദ്യാർത്ഥിയെ നാട്ടുകാർ കോതമംഗലത്തെ സ്വകാര്യ ആശുപത്രിയിൽ എത്തിച്ചെങ്കിലും പരിക്ക് ഗുരുതരായതിനെത്തുടർന്ന് പ്രാഥമിക ചികിത്സകൾ നൽകിയ ശേഷം, വിദഗ്ധ ചികിത്സക്കായി എറണാകുളത്തെ ആശുപതിയിലേക്ക് മാറ്റുകയായിരുന്നു.