ദേശീയ ഗ്രാമീണ തൊഴിലുറപ്പ് പദ്ധതി; കുട്ടമ്പുഴ പഞ്ചായത്തിന് പുരസ്‌കാരം

കോതമംഗലം : കോതമംഗലം ബ്ലോക്കിൽ മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഏറ്റവും കൂടുതൽ തൊഴിൽ ദിനം സൃഷ്ടിച്ച പഞ്ചായത്തിനുള്ള ബ്ലോക്ക് പഞ്ചായത്ത് അവാർഡ് കുട്ടമ്പുഴ പഞ്ചായത്തിന് ലഭിച്ചു. 2024 – 2025 സാമ്പത്തീക വർഷത്തിൽ ബ്ലോക്ക് പഞ്ചായത്ത് പരിധിയിലെ പത്ത് പഞ്ചായത്തുകളിൽ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ വിവിധ വിഭാഗങ്ങളിലായി തുക ചെലവഴിച്ചത് വിലയിരുത്തിയാണ് അവാർഡ് നൽകിയത്. കഴിഞ്ഞ സാമ്പത്തിക വർഷം 151470 തൊഴിൽ ദിനങ്ങളാണ് കുട്ടമ്പുഴ പഞ്ചായത്തിൽ നൽകിയത്. അതിൽ 796 കുടുംബങ്ങൾ എസ് റ്റി വിഭാഗത്തിൽ ഉണ്ട് .കൂടാതെ നൂറ് തൊഴിൽ ദിനങ്ങൾ ലഭിച്ച 493 കുടുംബങ്ങൾ കുട്ടമ്പുഴയിലാണ്. 7518000 രൂപയുടെ മെറ്റീരിയൽ വർക്ക് പഞ്ചായത്തിൽ പൂർത്തീകരിച്ചിട്ടുണ്ട്.

ബ്ലോക്ക് പഞ്ചായത്ത് പ്രസിഡൻ്റ് പി.എ.എം ബഷീർ അവാർഡ് ചടങ്ങ് ഉദ്ഘാടനം ചെയ്തു.വികസന കാര്യ സ്ഥിരം സമിതി ചെയർമാൻ ജോമി തെക്കേക്കര അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡൻ്റ് ഡയാന നോബി,കുട്ടമ്പുഴ പഞ്ചായത്ത് പ്രസിഡൻ്റ് കാന്തി വെള്ളകയ്യൻ ,ബ്ലോക്ക് പഞ്ചായത്ത് സ്ഥിരം സമിതി ചെയർമാൻ ജെയിംസ് കോറമ്പെൽ,ബ്ലോക്ക് പഞ്ചായത്ത് അംഗങ്ങളായ നിസ മോൾ ഇസ്മായിൽ, റ്റി.കെ കുഞ്ഞുമോൻ, ആനിസ് ഫ്രാൻസിസ്, സാലി ഐപ്, പഞ്ചായത്ത് അംഗങ്ങളായ കെ. എ സിബി, ഇ.സി റോയി, എൽദോസ് ബേബി, ജോഷി പൊട്ടക്കൽ, ബിഡിഒ സി. ഒ അമിത എന്നിവർ പ്രസംഗിച്ചു