കോതമംഗലം: എൻ.ക്യു.എ.എസ് ദേശീയ അംഗീകാരം ലഭിച്ച് ദിവസങ്ങൾ പിന്നിടുമ്പോൾ കോതമംഗലം താലൂക്ക് ആശുപത്രിയില്‍ നിലവിലുള്ള ഡോക്ടര്‍മാരുടെ പോലും സേവനം ലഭിക്കാതെ രോഗികൾ വലയുന്നു.തുടര്‍ച്ചയായ ദിവസങ്ങളില്‍ അവധിയോ മറ്റ് കാരണങ്ങളോ മൂലം നിലവിലുള്ള ഡോക്ടര്‍മാരിൽ പലരും ഒ.പി.യില്‍ എത്താത്ത സ്ഥിതിയാണുള്ളത്. ഈയാഴ്ച പല ദിവസങ്ങളിലും ഒ.പി.സേവനം നാമമാത്രമായിരുന്നു. ശനിയാഴ്ച ഒ.പി.യില്‍ ഉണ്ടായിരുന്നത് നാല് ഡോക്ടര്‍മാരാണ്.
ജനറല്‍ മെഡിസിനിലെ ഒരു ഡോക്ടറും, ജനറല്‍ സര്‍ജറി വിഭാഗത്തിലെ രണ്ട് ഡോക്ടര്‍മാരും, പീഡിയാട്രിക്സ് വിഭാഗത്തിലെ ഒരു ഡോക്ടറും ആണ് ഒ.പി.യിലുണ്ടായിരുന്നത്. ക്യാഷ്വാലിറ്റിയില്‍ രാവിലേയും വൈകുന്നേരവും രണ്ട് ഷിഫ്റ്റുകളിലായി ഓരോ ഡോക്ടര്‍മാരും ഉണ്ടായിരുന്നു. എല്ലാ ശനിയാഴ്ചകളിലും തന്നെ ഇതാണ് അവസ്ഥ. ആദിവാസികളടക്കമുളള സാധാരണക്കാര്‍ ആശ്രയിക്കുന്ന ആശുപത്രിയിലാണ് ആവശ്യമായ ഡോക്ടര്‍മാരുടെ സേവനം ലഭ്യമാകാത്ത സ്ഥിതിയുള്ളത്.
ദിനംപ്രതി നൂറുകണക്കിന് നിർദ്ധന രോഗികള്‍ ചികിത്സ തേടി എത്തുന്ന താലൂക്ക് ആശുപത്രിയിൽ പപ്പോഴു ഡോക്ടർമ്മാർ ഇല്ലാത്തതിനാൽ രോഗികൾ സ്വകാര്യ ആശുപത്രികളെയോ, സമീപ താലൂക്ക് ആശുപത്രികളെയോ ആശ്രയിക്കേണ്ട സ്ഥിതിയാണ്. മുൻപും പലവട്ടം ആവശ്യത്തിന് ഡോക്‌ടർമ്മാരുടെ സേവനം ലഭിക്കാതെ പരാതികൾ ഉയർന്നിട്ടുംമുൻസിപ്പൽ അധികൃതർ അടങ്ങുന്ന ഉത്തരാവാദിത്വപ്പെട്ട ആശുപത്രി മാനേജിംഗ് കമ്മറ്റി ഇക്കാര്യത്തില്‍ ഇടപെടല്‍ നടത്തുന്നില്ലെന്ന ആക്ഷേപം ശക്തമാണ്.
