കോതമംഗലം : മാര് അത്തനേഷ്യസ് എന്ജിനീയറിംഗ് കോളേജ് പ്രമുഖ ഡ്രോണ് ടെക് സ്റ്റാര്ട്ടപ്പ് ആയ ഫ്യൂസിലേജ് ഇന്നൊവേഷന്സ് പ്രൈവറ്റ് ലിമിറ്റഡുമായി ഡ്രോണ് പരിശീലനത്തിനും ഗവേഷണത്തിനും ധാരണാപത്രം ഒപ്പ് വച്ചു. കോളേജിന് വേണ്ടി പ്രിന്സിപ്പാള് ഡോ.ബോസ് മാത്യു ജോസ്, ഫ്യൂസിലേജ് ഇന്നൊവേഷനു വേണ്ടി ഡയറക്ടര് ദേവന് ചന്ദ്രശേഖരന് എന്നിവരാണ് ധാരണാപത്രം കൈമാറിയത്. ഇലക്ട്രോണിക്സ് എന്ജിനീയറിംഗ് വകുപ്പ് മേധാവി ഡോ. അജി ജോയ്, കമ്പ്യൂട്ടര് സയന്സ് ആന്ഡ് എന്ജിനീയറിംഗ് വകുപ്പ് മേധാവി പ്രൊഫ. ജോബി ജോര്ജ്ജ്, മെക്കാനിക്കല് എന്ജിനീയറിംഗ് വിഭാഗം പ്രൊഫസ്സര് ഡോ. സാബു കുര്യന്, ഇലക്ട്രോണിക്സ് എന്ജിനീയറിംഗ് വകുപ്പ് അസിസ്റ്റന്റ് പ്രൊഫസ്സര് ഡോ. അനില പി വി, ഫ്യൂസിലേജ് പരിശീലന വിഭാഗം മേധാവി പൃഥ്വി, ഓട്ടോണമസ് വെഹിക്കിള് ഇന്സ്ട്രക്ടര്മാരായ മിഥുന്, അജിത്ത് എന്നിവര് സന്നിഹിതരായിരുന്നു.
ഫ്യൂസിലേജ് ഇന്നൊവേഷന്സിന്റെ ഔദ്യോഗിക പരിശീലന വിഭാഗമായ ഫ്യൂസിലേജ് ഫ്ളൈയിംഗ് ക്ലബിന്റെ നേതൃത്വത്തില് ആണ് വിവിധ തരത്തിലുള്ള പരിശീലന ക്ലാസുകള്, തത്സമയ ഫ്ളൈയിംഗ് ഡെമോണ്സ്ട്രേഷനുകള്, പ്രായാഗിക പരിശീലനങ്ങള്, വ്യവസായാധിഷ്ഠിത പ്രൊജക്ടുകള്, വിദ്യാര്ത്ഥികള്ക്കുള്ള ഇന്റേണ്ഷിപ്പുകള്, പ്രൊജക്റ്റ് സഹായങ്ങള് എന്നിവ നടത്തപ്പെടുന്നത്.
വിദ്യാര്ത്ഥികള്ക്കും യുവാക്കള്ക്കും ഗവേഷകര്ക്കും വേണ്ടി ഒരുക്കുന്ന ഈ പരിശീലന പദ്ധതികളില്, ഡ്രോണ് നിര്മ്മാണം, ഫ്ളൈയിംഗ് പരിശീലനം, ഇന്ഡസ്ട്രിയല് ഇന്സ്പെക്ഷന്, കൃഷിയിലെ ആഗ്രിടെക് ആപ്ലിക്കേഷനുകള്, സര്വേയും മാപ്പിംഗും, പരിസ്ഥിതി നിരീക്ഷണം തുടങ്ങിയ വിഷയങ്ങള് ഉള്പ്പെടുത്തിയിരിക്കുന്നു.
