കോതമംഗലം : കോതമംഗലം- പുന്നേക്കാട് റോഡില്‍ ചേലാട് പള്ളിത്താഴം,സര്‍വ്വീസ് സഹകരണ ബാങ്കിന് മുന്നിലെ പ്രധാന റോഡിൽ കുഴി രൂപപ്പെട്ടു. വാഹന യാത്രക്കാര്‍ക്ക് അപകടഭീഷണിയാകുകയാണ് കുഴി. ദിവസവും നൂറുകണക്കിന് വാഹനങ്ങള്‍ കടന്നു പോകുന്ന റോഡില്‍ രൂപംകൊണ്ട കുഴി അടിയന്തരമായി അടച്ച് ഇതുവഴിയുള്ള യാത്ര സുഗമമാക്കണമെന്നതാണ് നാട്ടുകാരുടെ ആവശ്യം. കഴിഞ്ഞ ദിവസത്തെ ശക്തമായ മഴയില്‍ നിരവധി ഇരുചക്രവാഹനങ്ങള്‍ അപകടത്തില്‍പ്പെട്ടു.
കുഴിമൂലം ഇവിടെ ഇരുചക്രവാഹനങ്ങള്‍ അപകടത്തില്‍പ്പെടുന്നത് പതിവാണ്. ഭാരം കയറ്റിയ നിരവധി വാഹനങ്ങള്‍ രാപകല്‍ വ്യത്യാസമില്ലാതെ ഈവഴി കടന്നു പോകുന്നുണ്ട്. വലിയ അപകടങ്ങള്‍ ഉണ്ടാകുന്നതിന് മുമ്പ് അധികൃതര്‍ കുഴി നികത്താനുള്ള നടപടികള്‍ സ്വീകരിക്കണമെന്നാണ് നാട്ടുകാരുടെയും യാത്രക്കാരുടെയും ആവശ്യം.
